Makamba : Abigisha bahagaritse akazi kubera umugabo yafashe ku nguvu umunyeshure yarekuwe

Abo bigisha n’abo kw’ishure ry’intango rya Mugerama ya Gatatu ku mugwa mukuru wa komine Nyanza-Lac mu ntara ya Makamba. Bahagaritse kwigisha kuva kuri uyu wa kabiri.

Abo bigisha biyamiriza ingingo iherutse gufatwa n’igipolisi y’ukurekura umugabo waho i Nyanza-Lac yari yafashwe yagirizwa gufata ku nguvu umwana wo kuriryo shure, mbere akaba yaranamuteye inda amugira umugore wiwe. Uwo mugabo imbere y’uko afatwa n’igipolisi yari yafashe abandi bana b’abakobwa, nibo bamureze kuko bamugize imbohe kumara imisi irenga itanu i muhira i we.

Mu nyuma, uwo mugabo yaciye aja kuri iryo shure ahitana umwe mu bigisha baho aramukubagura yongera aramukubitira imbere y’abanyeshure. Igipolisi gifadikanije n’igisirikare caciye kimuta muri yompi ariko muri iyi ndwi mu ntango zayo uwo mugabo yararekuwe n’igipolisi.

Ikibabaza abo barimu n’ukubona uwo mugabo arekurwa kandi biboneka neza ko icaha kimwagira na rirya uwo mwana w’umwigeme yatwaje inda bakibana. Mu gipolisi hoho basigura ko icatumye uwo mugabo arekurwa ari uko basanze nyene kwagirwa n’icaha ata myaka afise yemejwe n’amategeko y’ugufungwa.

Si irya mbere aho mu ntara ya Makamba havugwa ihagarikwa ry’akazi mu gisata c’indero kubera bene iyo mvo. Gusha ubu , abo bigisha ntibaramenyesha aho bazosubirira ku mirimo.