Mali : Ihoteri Radisson yatewe n’abihevyi

Ihoteri Radisson yo mu gisagara ca Bamako mu gihugu ca Mali yatewe mu gatondo ko kuri uwu wa gatanu n’abihevyi bitwaje ibirwanisho.
Iyo hoteri isanzwe izwi ko yakira kenshi abanyamahanga, cane cane Abafaransa. ivyononekaye ntibiramenyekana.

Abantu bitwaje ibirwanisho bivugwa ko ari aba jihadistes binjiye muri iyo hoteri iasanzwe ari iy’umunyamerika, bagira imbohe abantu, abatari bake bakaba bamaze kwitaba Imana. Abo bitwaje ibirwanisho baciye mu ryahumye abajejwe umutekano kuri iyo hoteri, kuko imiduga bajemwo yari ifise iparati ndangamuduga z’abaserukira ibihugu vyabo aho muri Mali (Plaques diplomatiques), ari navyo vyatumye badasakwa.

Mu makuru amaze kumenyekana, n’uko abamaze kwitaba Imana bagizwe n’abakozi bo kuri iyo hoteri hamwe n’abakiriya bari muri iyo hoteri igizwe n’ivyumba 190, umuyobozi wayo akaba yavuze ko ivyo vyumba vyarimwo abantu ku bice 90 kw’ijana.

Abanyamerika bose baba mu gisagara ca Bamako basabwe kwinyegeza kure, cane cane babandanye kuvugana n’imiryango yabo. Ibitero vyabereye mw’igorofa y’indwi, abarwanyi baba jihadistes bakaba bariko barasa amasasu menshi.