Mali:U Bufaransa busaba ko abasirikare b’ibihugu vya muri Afirika bija imbere mu Rugamba

Umushikiranganji ajejwe imigenderanire w’igihugu c’Ubufransa, Laurent Fabius yatangaje kw’igihe kigeze kw’inteko z’ibihugu vyo muri Afrika zija imbere mu rugamba rw’ugutuza intagondwa z’Aba Islamu, mu buraruko bw’igihugu ca Mali.

Ivyo Laurent Fabius, yabitangaje mu nama yihutirwa y’abategetsi b’igihugu vyo mu karere ko muri Afrika yo mu burengero yabaye ejo ku musi wa gatandatu, mu gisagara ca Abidjan, mu gihugu ca Cote d’Ivoire, aho baganiye ivyerekeye kurungika izindi nteko, mu gihugu ca Mali, gufasha inteko z’igihugu c’Ubufransa, mu rugamba rw’ukugwanya intagondwa z’AbaIslamu.

Bitegekanijwe kw’ibihugu bihana urubibe na Mali birungika inteko ibihumbi bitatu canke zirenga muri Mali, inyuma yuko Ubufransa burungitse inteko muri ico gihugu haraheze hafi indwi guhagarika abagwanyi b’abaIslamu bigaruriye uburaruko bw’igihugu, bariko batera bigira imbere mu bumanuko bw’igihugu.

Abategetsi, mu gihugu ca Mali batangaje ku musi wa gatanu kw’inteko za Leta zifashijwe n’Ubufransa zasubiye gufata igisagara ca Diabaly zikaba zatujije intagondwa z’AbaiSlamu, zari zafashe ico gisagara ku musi wa mbere.

Inteko z’igihugu ca Mali zari zatangaje imbere yaho ko zari zafashe kandi igisagara ca Konna, mu buseruko bwa Mali.