Mishiha : Umusirikare yafatanywe itonga ariko ashurashuza akana k’akigeme

Akigeme k’imyaka itandatu mu ntara ya Cankuzo muri komine ya Mishiha, kafashwe ku nguvu n’umusirikare wa Reta, ubu uyo yakoze ico caha akaba ari mu minwe y’igiporisi.

Amakuru ava aho i Mishiha, avuga ko iryo bara ryagwiriye ku musozi wa Kinehe, aho uyo musirikare yafata ako kana, agaca agashurashuza. Amakuru yemezwa n’abanyagihugu baho i Kinehe, avuga ko uyo musirikare yafashwe ariko arahumira ako kana, yafatanywe itonga, ubu apfungiwe mu giporisi i Mishiha.

Yaba abavyeyi canke ababanyi b’uyo mwana, bose basaba ko ubutungane bwohasha iyo nkozi y’ikibi bimwe vy’akarorero. Ako kana nako fafashwe ku nguvu ubu kakaba kariko karakurikiranwa n’abaganga, kugira bagakingire zimwe mu ndwara zica mu bihimba vy’irondoka, harimwo n’umugera wa Sida.