Misiri : Abagera kuri 18 baguye mu gitero

Abantu cumi na batandatu niba bamaze kumenyekana ko bapfuye baturiwe n’umuriro, abandi bagera kuri babiri barakomereka mu gitero cabaye mu gatondo ko kuri uwu wa gatanu, mu bunywero n’uburiro bw’ahitwa Agouza, mu gisagara ca Kayiro Mu Misiri.

Abateye ubwo bunywero n’uburiro baciye batungwa n’ayo bameze, igiporisi c’aho i Kayiro kikaba kiriko kirabakurikirana. Iyo nzu yatewe yaciye isha, umwotsi mwinshi ukaba ariwo waboneka mu ruhande rurimwo ubutambiro muri iyo nyubakwa.

Igiporisi c’aho i Agouza kimenyesha ko muri ico gitero hakoreshejwe igisasu ca peterori (cocktail Molotov) catewe muri iyo nyubakwa, haca haduka umuriro.

Umwe mu bayobozi b’iyo nzu yatewe amenyesha ko abateye boba bagizwe n’abakozi baheruka kwirukanwa, abandi bakavuga ko ico gitero coba caturutse ku kutumvikana kwaheruka kwibonekeza hagati y’abakozi bo mu kibanza c’ubutambiro (Discothèque), hamwe na bamwe mu rwaruka rwakunda kuja kwidagadurira muri ico kibanza.