Misiri : Hosni Mubarak yasohotse ibohero

Hosni Moubarak, uwahoze ari umukuru w’igihugu ca Misiri yasohotse agasho k’i Tora inyuma y’imyaka ibiri, ku muhingamo wo kuri uyu wa kane, mu gihe c’isaha umunani ku saha mpuzamakungu. N’aho sentare yubahirize ingingo yo kumurekura, agiye kuguma afunzwe icamaso, mu kurindira ko asubira kwitaba ubutungane kuwa 25 Myandagaro, abazwe ku bwicanyi yagirizwa bwahitanye abanyagihugu 850 bari mu myiyerekano yamukuye ku butegetsi muri Nzero umwaka w’2011.

Agisohoka agasho k’i Tora mu gisagara ca Kayiro, Hosni Moubarak yaciye ajanwa na kavugujugu ku bitaro vya gisirikare biri hafi yaho yahora apfungiwe.
Abategetsi ba gisirikare mu Misiri bategetse ko akomeza gufungishwa ijisho inyuma y’aho sentare itegekeye ko arekurwa kuko yari yakwije umwanya ntarengwa umuntu ategerezwa gufungwa imbere y’uko urubanza rutangura.