Muramvya : Abanyeshure bagirizwa gutuka umukuru w’igihugu bagumijwe mu munyororo

Sentare y’i Muramvya yafashe ingingo ku muhingamo wo kuri uwu wa mbere, yo kugumiza mu munyororo abanyeshure batanu bo kw’ishure ryisumbuye ryo mu ntara ya Muramvya.

Abo banyeshure bose uko ari batanu bagirizwa icaha c’ugutuka umukuru w’igihugu, bakaba bagiye kubandanya baburana bava mw’ibohero rya Muramvya aho bapfungiwe.

Umushikirizamanza kizigenza wa Repuburika yaheruka kumenyesha ko yatanguje dosiye y’amatohoza ku banyeshure bo ku mashure yisumbuye atatu yo mu ntara ya Muramvya, bagirizwa icaha c’ugutuka umukuru w’igihugu. Batandatu bakiri abana (Mineurs) muri cumi n’umwe bagirizwa ico caha, barahawe umwidegemvyo w’agateganyo, hasigara hapfunzwe batanu bakwije imyaka y’ugukurikiranwa n’ubutungane (Majeurs).

Abo banyeshure bagirizwa ko aribo bafutanganije isanamu y’umukuru w’igihugu Petero NKURUNZIZA iri mu bitabu vy’ishure shingiro abo banyeshure bigiramwo.