Muramvya : Ibombora bombora mu mugambwe UPRONA

Ibombora bombora rirabandanya mu mugambwe w’Abadasigana UPRONA. Concilie Nibigira yasubiye kwirukanwa muri uwo mugambwe, ivyo bikaba vyakozwe n’abo bari kumwe mu ntara asanzwe avukamwo ya Muramvya.

Nk’uko umukuru w’uyo mugambwe muri iyo ntara abivuga, Concilie Nibigira, umushikiranganji w’ukumenyesha amakuru Tharcisse Nkezabahizi hamwe n’abandi bane, bose, bakaba birukanywe bagirizwa ko bariko basambura umugambwe wa Rwagasore, mu gihe bagirizwa ko mu nama yabaye kuri uyu w’Imana uheze, ata mudasigana w’ukuri yayirimwo, ahubwo yitabwe n’abari mu mugambwe FNL wo kwa Jacques Bigirimana co kimwe n’abanywanyi ba CNDD FDD.

Mu mugambwe UPRONA ishami rya Concilie Nibigira ariryo ryemewe n’ubushikiranganji bw’intwaroyo hagati mu gihugu, bakaba batera ivyatsi iyo ngingo, aho bavuga ko iyo ngingo y’abari muri komite nkuru y’umugambwe mu ntara ya Muramvya ataco ivuze, ndetse ata nico yoshikako. Concilie Nibigira akaba amenyesha ko ibintu vyahindutse, ndetse ubwatsi busha bukabisa ubundi.