Mutaho: Musitanteri yagirizwa urupfu rw’umunyagihugu

Musitanteri wa Komine Mutaho Emmanuel de Montfort Ndayiragije, yaratanze imihoho ku bushake bwiwe mu mabanga yo kurongora komine Mutaho nk’uko ayo makuru ava mu mugambwe asanzwe aturukamwo CNDD-FDD, mu gihe abandi bavuga ko ahubwo yabisabwe n’abamukuriye.

Emmanuel de Montfort Ndayiragije yaragirijwe akatari gake n’abanyagihugu arongoye ko abahohotera bimwe bikabije mu minsi iheze, ubu naho, abanyagihugu bakamwagiriza ko ariwe aha ibirwanisho imbonerakure zo mumugambwe CNDD-FDD zaho muri komine Mutaho.

Si ivyo gusa uwahoze ari musitanteri wo muri komine Mutaho yagirijwe n’abanyagihugu kuko avurwa n’ukuba nawe nyene yoba ari mu badandaguye Yohani Butoyi umuvyeyi w’umukuru w’umugambwe CNDD-FDD aho muri komine Mutaho.
Emmanuel de Montfort Ndayiragije akaba yatanze imihoho inyuma yaho hafatiwe abantu batanu harimwo umukuru w’imbonerakure zaho muri komine Mutaho kumvo z’amatohoza ku rupfu rwa Butoyi Yohani.

Abanyagihugu ba Komine Mutaho rero bakaba baranezerejwe cane n’itanga imihoho rya musitanteri wabo kuko kwubahiriza agateka ka zinamuntu ngo ataco vyamubwira. Abanyagihugu rero bakaba basaba musitanteri mushasha kwubahiriza abo arongoye ndetse ikubagurwa abo banyagihugu bari bamazemwo iminsi rigahagarara.

N’abandi bantu baragize ico bavuga ku bijanye n’itanga imihoho ry’uyo musitanteri, kuko amatohoza azoca yoroha, na cane cane ko iyo aguma ari musitanteri abanyagihugu botinye kumwagiriza. Ubutungane rero bugasabwa gutanga umuco ku vyagirizwa uwahoze ari musitanteri wa komine Mutaho, Emmanuel de Monfort Ndayiragije.