Accueil > Amagara y’abantu > Indwara zo gufungura nabi zirabangamiye bamwe mu bana b’i Mutumba
Indwara zo gufungura nabi zirabangamiye bamwe mu bana b’i Mutumba
mercredi 22 Nzero 2014
Indwara zijanye n’ugufungura nabi zirabangamiye abana n’abavyeyi b’i Mutumba mu ntara ya Bujumbura Rural, ivyo bikibonekeza mu gihe abana batari bake, baherekejwe n’abavyeyi babo, bahabwa n’ikigo c’ababikira imfungurwa zituma indwara ya Kwashi ikira, abamaze kuyirwara.
Nk’uko bamwe mu bavyeyi babitubwiye baherekeje abana babo gufungura ubwoko bw’ibisuguti, n’uguhabwa ifu y’ibiyoba kugira indwara ya kwashi irembeje abo bana igabanuke, bavuga ko umwana umwe canke babiri, usanga barwaye mu mihana imwe imwe, yaho muri Bujumbura Rural. Abavyeyi b’abo bana bakaba bavuga ko inzara yateye bivanye n’ukwo imyumbati n’ibitoke aho muri iyo ntara ya Bujumbura Rural vyatewe n’indwara, bica birahona, ikindi kandi, akaba ari intambara ihitiye, iyo nayo ikaba yasize iyo ntara mw’iheruheru ry’ingorane zitandukanye.
![](local/cache-vignettes/L672xH504/malnourri-99faa.jpg?1551397674)
Umubikira akurikirana ibijanye n’izo ndwara aho i Mutumba, Mama Filote Nduwamungu, akaba yavuze ko abanyagihugu bafungura nabi, mu gihe imfungurwa y’ubutsima n’imboga (irengarenga) ariyo gusa usanga abanyagihugu bamazeko igihe, ivyo bigatuma indwara zijanye n’ugufungura nabi zifata abana ndetse n’abavyeyi babo, mu gihe abo banyagihugu badashoboye gufungura ubwoko bwose bw’imfunguro arizo ndemamubiri, ntanga nguvu na nsanganyangaburo.
Uyo mubikira, akaba yavuze ko abavyeyi baheza bagahabwa inyigisho zo gufungura neza, bagafungura imfungurwa yuzuye, kugira amagara yabo n’ayabana babo ntiyononekare. Mama Filote Nduwamungu akavuga ko izo nyigisho zifasha, kuko igitigiri c’abarwaye ingwara ya kwashi kiriko kiragabanuka.
![](local/cache-vignettes/L600xH450/dscn9955-bcaab-adca2.jpg?1517378559)
Aristide Nizigire
Messages
23 Nzero 2014, 07:27, par Kabizi
Ndabira abo bana ingene bameze amahera akajanwa kwubaka ibibuga vy umupira! bizokinirwako N’imizimu?Ewe Burundi waragowe!Tabara Mana tabara!