Mwaro : Imvura nyinshi yononye imirima

Imvura nyinshi yarononye imirima y’ibigori n’ibiraya mu ntara ya Mwaro, komine Gisozi, ku munsi w’ejo kuwa kane. Ubu imiryango igera ku majana ane na mirongo itanu iri mu kangaratete, yabuze uko ibikika.

Musitanteri wa komine Gisozi, intara ya Mwaro amenyesha ko iyo mvura nyinshi ivanze n’urubura yaguye ku munsi w’ejo ku muhingamo yahitanye imirima myinshi y’ibigori, ibiraya n’ibiharage.

Imiryango iharurwa mu majana ane na mirongo itanu y’abarimyi yo muri iyo ntara yashikiwe n’ivyo vyago ubu ntigira uwo yokwitura, ikaba isaba abagira neza ko boyigarukira.

Muri iyo ntara, mu bihe vy’imvura, abarimyi barahura kenshi n’ivyo bibazo vyo guhomba bihuye n’iyo mvura itwara ivyo baba barimye. Basaba ko abafundi b’indimo boza barabereka uko baca imikobeko, kandi bigishwe kurimira ku misozi, bazi n’ubuhinga bokoresha kugira ivyo bateye bishobore kurinda imvura nyinshi n’inkukura. Ivyo babisaba mu gihe abanyagihugu bo mu ntara ya Mwaro, n’abarundi benshi muri rusangi batunzwe n’uburimyi.