Mwumba : Hashizweho umurwi kugira urwanye inda z’indaro ku banyeshure

Muri komine ya Mwumba intara ya Ngozi, bariteguriye umwaka w’ishure w’2014 ushira 2015 mu mashure, naho bimwe bikigoranye nk’ibikoresho vyo mu mashure nshingiro.

Muri iyo komine, amanama hagati y’abajejwe indero hamwe n’abayobozi b’amashure aragirwa cane, kandi n’ibimaze gushikwako bishimishije kuko ivyankenerwa vy’ibanze vyarabonetse kugira baze bashobore kwakira abanyeshure naho ibitigiri bishishikara kwiyongera. Ariko rero muri iyo komine, ibitigiri vy’abana baheba amashure biguma vyiyongera, ivyo bigatuma abana benshi baja mu bindi bikorwa, ndetse aho bimwe usanga bidashimishije. Muri abo bayacira hagati kandi, abana b’abigeme baza ubwa mbere, bivuye kugutwara inda batipfuza.

Mukamenya ko buramatari w’iyo ntara yashizeho umurwi wo kurwanya iyo ngeso ku bana b’abigeme gutwara inda z’ishushu. Iyo komine ya Mwumba rero ikaba iza kw’isonga ku rwego rw’intara ya Ngozi.