Ngozi : Abanyagihugu bankiwe kwifadikanya na Bob Rugurika

Mu gatondo ko kuri uwu wa kabiri, amabarabara yose ashika ahakorera RPA Ngozi yari yugawe. Mu giporisi bamenyesha ko banse imyiyerekano itarekuwe n’amategeko, mu gihe umuyobizi wa RPA Ngozi avuga ko bari abanyagihugu baje kwifadikanya n’iyo nsamirizi.

Kuri uwu wa kabiri w’urwatsi rubisi (Mardi Vert), abanyagihugu bo mu ntara ya Ngozi bari baje kwifadikanya na RPA Ngozi ntiboroherejwe. Kuva mu gatondo, igiporisi cari cazibiye amabarabara yose ashika ahakorera RPA muri iyo ntara. Abantu bose bambaye impuzu zirimwo amabara y’urwatsi rutoto, canke bafise agatambara canke akamwanya k’urwatsi rutoto barasubizwa inyuma. Yari amashirahamwe adaharanira ivyicaro vya poritike, hamwe n’abamenyeshamakuru bakorera mu buraruko, bari bitavye akamo ko kuja ahakorera iyo radiyo, mu ntumbero yo kwifadikanya na Bob Rugurika, umuyobozi wa RPA apfungiwe mw’ibohero rikuru rya Muramvya. Mu nyuma n’abandi bose, harimwo n’abariko baja mu mirimo yabo ya minsi yose, barankiwe kurengana, aho hakaba harimwo n’umudandaza yankiwe kurengana kubera mu mabesani yariko aradandaza harimwo izisa n’urwatsi rubisi. Mu giporisi bamenyesha ko banse imyiyerekano itarekuwe n’amategeko.

Abanyagihugu bo mu ntara ya Ngozi

Umuyobozi wa RPA Ngozi, Yvette Murekasabe asigura ko ata myiyerekano yari yateguwe, ko bari abanyagihugu bateguye kugendera ibigo vy’iyo nsamirizi RPA kugira bifadikanye nayo muri iyi minsi Bob Rugurika apfunzwe. Abo banyagihugu bakaba bari bitwaje inzandiko zisaba ubutungane bw’Uburundi ko bwokwikubita agashi bukarekura Bob Rugurika.

Bob Rugurika, umuyobozi wa RPA akwije iminsi 16 mw’ibohero. Yatumweko mu butungane na Emmanuel Nkurikiye, icariho c’umushikirizamanza kizigenza wa Repuburika y’Uburundi, ari nawe yamwumvirije, aca afata ingingo yo kumurungika mw’ibohero kw’itegeko rya Arcade Nimubona umushikirizamanza wa Repuburika mu gisagara ca Bujumbura. Inyuma y’amakuru yashikirijwe na RPA ku matohoza yakozwe ku bwicanyi bwakorewe ababikira batatu b’Abatariyanokazi, umuyobozi wa RPA Bob Rugurika yaciye atabwa mu mvuto, akurikiranwako ivyaha vyo kuba ataco yashikirije igihe ubwo bwicanyi bwariko burategurwa (manquement à la solidarité publique), gukorana n’abicanyi (complicité d’assassinat), gutanga amakuru w’urubanza rukiri mw’itohozwa (Violation du secret de l’instruction). Bitegekanijwe ko kuri uwu wa gatatu ariho ingingo iza gufatwa, namba Bob Rugurika yorekurwa akaburana yidegemvya, canke akabandanya kuburana ari mu munyororo.