Nigeria : Boko Haram ibandanya kwiha inkumbi

Hafi y’ahanyururijwe abanyeshure barenga 200, niho haraye hasubiye kurwa irindi bara, aho abantu barenga icumi baraye bagandaguwe bunyamaswa hafi y’igisagara ca Chibok.

Nk’uko vyemezwa n’abarongoye abandi muri ico gisagara,abarwanyi b’umurwi wa Boko Haram akaba ariwo waraye wishe abo banyagihugu. Bavuga begeranije imivyimba y’abantu batari munsi ya cumi, kandi muri abo bikaba vyaboneka ko bapfuye babanje kuraswa. Muri ako gace ka Chibok rero, hakaba hamaze gusiga ubuzima abantu batari bake, kandi bose bakagirizwa intagondwa zo mu muhari wa Boko Haram.

Mwomenya ko muri ico gitero caraye kibaye kuri uyu wa gatandatu igenekerezo rya 21 Ruheshi, abo bicanyi baje mu miduga, abandi nabo baza ku mapikipiki baca bashikira kwugururira umuriro mu banyagihugu. Abanyagihugu bomuri akogace, bakavuga koumurwi wa Boko Haram wabatuntuje, kuko ababo bamaze kuhasiga ubuzima ari ikirenga.