"Ntarigara dukeneye gusubira kwumva mu gihugu!"

Mu gihe abajejwe intwaro n’umutekano bakunda kwumva abanyagihugu abidogera uturwi tw’amarigara arwiriye aha na hariya mu gihhugu c’Uburundi, ko abatugize babakubagura bagahungabanya n’agateka kabo, umukuru w’igihugu Petero Nkurunziza avuga ko agiye kuduhagurukira atakinya.

Umukuru w’igihugu rero akaba yibutsa amabi y’utwo turwi tw’urwaruka na bamwe ndetse mu bantu bakuze, ataco bagomba guhereza iminwe atari ukunyaga utwo abandi babiriye akuya. Irigara rero ngo ni ishure ry’ububegito, aho bigira gufata abakenyezi ku nguvu, kwiba eka ndetse n’ugukora ayandi marorerwa menshi ateye isoni. Umukuru w’igihugu nyahubahwa Petero Nkurunziza akaba yemeza ko hagiye gukorwa ibiboneka kugira mwene iyo mirwi ituzwe, yijukire ibikorwa vyobateza imbere hakuzinduka, bakirirwa ku mabarabara, umunsi wose ugahera ataco bahereje amaboko.

Haba mu gisagara ca Bujumbura mu bice nka vyose, imirwi y’amarigara iriho ndetse hamwe ugasanga abanyagihugu baheba bakareka n’uguca mu tuyira baba bazi ko twigaruriwe n’abo batagira ico bakora. Abatinya kwibwa urukombamazi canke inkumi n’abapfasoni batinye gusinzikarizwa ubuzima, baraheza bagafata ayandi mayira nk’uko bivurwa na Jeanette Niyokwizera, umwigeme wo muri komine ya Nyakabiga avuga ko hari aho atoca buriko burira, ndetse no mu gatondo kare cane, agatanga akarorero, ibarabara riva mu Nyakabiga rija guhura n’iryitiriwe uwa 28 Munyonyo, aho no ku murango, uhasanga urwaruka rwuzuye, ataco ruriko rurakora.

Wawundi ati akari mu mpene niko kari no mu ntama, no mu ntara zo hagati mu gihugu, utwo turwi turiyo, natwo nyene tukaba co kimwe n’utwo mu gisagara ca Bujumbura tugabishwa n’umukuu w’igihugu ko tugiye gutuzwa vuba. Tukabamenyesha ko nko muri quartier Asiatique iri mu gisagara ca Bujumbura, amarigara yari amaze iminsi agisibije mu kwiba n’ayandi mabi yakorwa, ubu batujijwe nk’uko bivurwa n’abanyagihugu baho, bikemezwa n’abarongoye intwaro n’umutekano.