Ntivyoroshe gutandukanya Conciliya Nibigira n’umuvugizi wa CNDD FDD

Mu kiganiro Concilia Nibigira arongoye UPRONA yemewe n’ubushikiranganji bw’intwaro yo hagati mu gihugu yahaye abanditsi n’abamenyeshamakuru, ntiyashatse kwerekana aho ahagaze ku bijanye n’ibirwanisho bivugwa ko biriko biratangwa mu Burundi.

Concilia Nibigira amenyesha ko abasohoye urwo rwandiko avuga ko ruca ivutu, bokwerekana ivyemezo nibaba babifise, n’abo vyagirizwa nibaba bariho, bifashe abariko barabigira amatohoza. Mu gihe atavyemeza vyoba biriho, uwo mupfasoni asaba abakwiragiza ivyo bihuha, kwirinda iyo mvugo ica ivutu, igatoneka ibikomere vy’abarundi bitarazimangana, kubera akahise kabi mu Burundi. Asaba kandi kwirinda guca ivutu abarundi kuko bishobora gusubira kubaryanisha kandi atamvo zifashe zihari. Kuri ivyo nyene, agasaba abanyeporitike kugabanya imvugo iteranya mu binyamakuru no mu mboneshakure, bitwararike gukurikirana ibikorwa vy’urwaruka rubayoboka, na cane cane muri ibi bihe abarundi bimirije amatora.

Ivyo rero, uwo mupfasoni akaba yabishikirije mu gihe ishirahamwe mpuzamakungu ONU riherutse kugabisha Uburundi, ko bwokurikiranira hagufi itangwa ry’ibigwanisho vyahawe rumwe mu rwaruka rw’Imbonerakure za CNDD FDD, kandi iryo shirahamwe rikagiriza bamwe mu basirikare bafise ipete rya general, kuba aribo batanze ivyo birwanisho, bakavuga n’aho vyatangiwe, n’ahabereye imyimenyerezo.

Bikagaragara ko Concilie Nibigira yanyarukije kwerekana aho ahagaze kubw’ishami ry’umugambwe arongoye, mu gihe muri uwo mugambwe naho bari muri Reta, ata matohoza bagize, kugira bafashe Reta kubeshuza ivyavuzwe na ONU.

Mu bibazo uwo mupfasoni yabajijwe haba ku kibazo kijanye n’ikiringo ca gatatu c’umukuru w’igihugu, ivyerekeye urwaruka rw’Imbonerakure za CNDD FDD zagirizwa gukubagura abatavuga rumwe n’ubutegetsi, Conciliya Nibigira bikaba bitari vyoroshe kumutandukanya n’aho yoba ari umuvugizi wa Reta y’Uburundi, canke uwoba ari mu mugambwe uri ku butegetsi CNDD FDD.

Yanse kwerekana aho ahagaze kuri ivyo bibazo nkoramutima bihanze Uburundi muri iyi minsi, hamwe akavuga ko arindiriye ko abo bafashanije kurongora umugambwe bavyiga, nawe aronke ico ashikiriza, ahandi agasaba ko ubutungane bwokora.