Nyakabiga : Igice c’ishengero Guérison des âmes cahiye kiratokombera

Ishengero Guérison des âmes ryo mu Nyakabiga mu gisagara ca Bujumbura ryahiye riratokombera, aho ahasinzikaye cane ari ahasanzwe habikwa ivyuma bikoreshwa mu guhimbaza Imana.

Nk’uko abakristu bo kuri iryo shengero babitwiganiye, iryo shengero Guérison des âmes ryafashwe mw’ijoro ryo kuri uyu w’Imana ushira uwa mbere. Ahatanguye gufatwa akaba ari ahasanzwe habikwa ivyuma, aho bibaza ko uwo muriro woba waturutse ku ntsinga z’umuyagankuba. Ico kibanza basanzwe babikamwo ivyuma bikoreshwa mu guhimbaza Imana kimaze gufatwa, kikaba caciye kidomeka mw’isengero, ariko Imana ikaba yakinze isengero ntiyahiye rwose, kuko igiporisi kijejwe gukinga impanuka caciye kihashika vuba, kirazimya.

Mukamenya ko abakristu bo kw’ishengero Guérison des âmes co kimwe n’abayirongoye bari batamariwe, mu gihe ku munsi w’ejo igenekerezo rya 20 Ndamukiza bavuga ko bari bahimbaje Pasika mu kanyamuneza kadasanzwe. Ugusha kw’isengero yabo rero, bakavuga ko ari ibikorwa bibi vya satani yaje kubavangira, mu gihe n’ubu bari bacigina intsinzi y’Umwami Yesu Kristu yazutse mu bapfuye. Abasanzwe bahasengera, bakaba bariko barakubura, bongera basohora umunyota n’intebe.