OAG : Umushikiranganji w’amagara y’abantu siwe yari kwishura ku bibazo bijanye n’amakori

Inyuma y’aho umushikiranganji w’amagara y’abantu no kurwanya ikiza ruhonyanganda Sida, muganga Sabina Ntakarutimana atangiye insiguro imbere y’inama nkenguzamateka y’Uburundi ku vyerekeye integuro y’itegeko rigenga amakori, ishirahamwe ryishinze gukurikiranira hafi ibikorwa vya leta OAG rirabinegura.

Godefroid Manirakiza, umuvugizi wa OAG avuga ko umushikiranganji w’amagara y’abantu atariwe yari akwiye kuja gutanga insiguro imbere y’inama nkenguzamateka ku vyerekeye iryo tegeko rigenga amakori. Uburyo amakori atangwa n’ibibazo vyerekeye ubuhinga (questions techniques), ari naco gituma hari kugenda uwubijejwe w’ikigega ca Leta.

Godefroid Manirakiza asaba abakenguzamateka gukora neza ivyo bajejwe, cane cane gukurikiranira hafi ibikorwa vya Leta. ’’Abashingamateka ntibari bakwiye kubaza ibibazo vy’amakori umushikiranganji w’amagara y’abantu hamwe no kurwanya ikiza ruhonyanganda Sida. Godefroid Manirakiza ahamagarira inama nshingamateka na nkenguzamateka gukurikirana no gukora neza ivyo bajejwe.

Muri Leta y’Uburundi, babicishije kuri Filipo Nzobonariba, umuvugizi wayo, bamenyesha ko ari ibisanzwe ko umwe mu bashikiranganji bagize Leta y’Uburundi aja gusigura iryo tegeko kuko ryari ryaciye mu nama nshikiranganji rikongera rigatorwa na bose. Kubwa Filipo Nzobonariba, nta gitangaje umwe mu bashikiranganji agiye kurisigura.

Filipo Nzobonariba, umuvugizi wa Leta y’Uburundi akaba yamenyesheje ko umushikiranganji w’ikigega ca Leta yari yafatiriwe kuko yari mu rugendo rw’akazi i Washington.