OLUCOME iratera ivyatsi umugambi wo gushira hamwe AFRICELL na ONATEL

Ishirahamwe OLUCOME ririyamiriza umugambi uhari wo gushinga ishirahamwe ryiswe Mobile Virtual Network Operator Burundi rigomba gufatanya amashirahamwe abiri yo gutumatumanako amakuru, AFRICELL na ONATEL, mu bisata vyo gutumatumanako amakuru (volet mobile).

Mw’ishirahamwe OLUCOME (Observatoire de Lutte contre la Corruption et les Malversations Economiques) bafise amakenga ko hoba hari ubusuma bwinyege inyuma, ndetse ko bwoba ari uburyo bwihishije bwo gushira mu minwe y’abikorera utwabo ONATEL bidakurikije amategeko yaba ayagenga amashirahamwe hamwe n’ayagenga urudandazwa, nk’uko Gabriel Rufyiri, umukuru wa OLUCOME yabishikirije mu kiganiro n’abamenyeshamakuru co kuri uno wa gatatu igenekerezo rya 12 Munyonyo 2014.

Mu gihe rya shirahamwe rijejwe gucungera ivy’itumatumanako amakuru ARCT ryatangaje ko AFRICELL izoba yugaye kuwa 16 Kigarama uno mwaka, Gabriel Rufyiri avuga ko bwoba ari nk’ubusuma, kuko bisigura ko AFRICELL izoca ikorera ku ruhusha (licence) rwa ONATEL. N’aho avuga ko atavyigwa yagize vy’agahombo muri rusangi, Gabriel Rufyiri aremeza ko igihugu kizohahombera ibitari bike mu gihe uruhusha hano mu Burundi (licence) kugira ishirahamwe ryemererwe gukora ari imiriyoni 10 z’amadorari y’abanyamerika. Gabriel Rufyiri akerekana kandi n’akandi gahombo nk’amatagisi, amakori yahora atangwa na Africell, abakozi ba AFRICELL bagiye gutaha ndetse n’amatagisi bahora batanga akaba agiye kudasubira kuboneka.

Gabriel Rufyiri, arongoye ishirahamwe OLUCOME (Observatoire de Lutte contre la Corruption et les Malversations Economiques)

Umukuru wa OLUCOME abandanya avuga ko bibabaje kubona ivyo bikorwa hashobora kuba harimwo ukuboko kw’ubushikiranganji bw’intwaro ibereye hamwe no gushira mu minwe y’abikorera utwabo amashirahamwe ya Reta, kuko ubwo bushikiranganji bwarungitse intumwa mu gihugu ca Jordanie zagiye kubonana nabo bazoshinga iryo shirahamwe, ikibababaje rero n’uko bamwe bamwe muri Reta boba biteguriye gufata ibibanza vy’abanyamitahe ba Africell bo hano mu Burundi.

Umukuru wa OLUCOME avuga ko atumva ukuntu bafata ishirahamwe ririko rishaka gushirwa mu minwe y’abikorera utwabo nka ONATEL, ndetse ryugarijwe n’amadeni y’umurengera, bagashaka kurishira hamwe n’ishirahamwe rigomba ryugarwe kandi ridafise n’uruhusha.

Muri OLUCOME bakabona ko ivyo biteye amakenga uravye umwete n’ubwihusi bwinshi ivyo biriko birakorwamwo. Muri OLUCOME berekana n’utundi turorero tw’amashirahamwe atari make yagiye ashingwa gihutihuti agaragaramwo amahinyu menshi nka Viettel n’ayandi, kubera inyungu z’akarwi ka bamwe mu bategetsi. Ishirahamwe OLUCOME risaba umukuru w’igihugu guhagarika ivyo bintu kuko bishobora guteza ingorane ONATEL na Reta.