OLUCOME yagiriza umukuru w’igihugu kwitiranya ivy’umuryango wiwe n’ivy’igihugu

Ishirahamwe OLUCOME bagiriza umukuru w’igihugu ko adatandukanya ibikorwa vy’umuryango wiwe, hamwe n’ivyo kurongora igihugu, aho mbere n’imfashanyo zagiye ziratangwa mu mashirahamwe arongoye, kandi amategeko atamurekurira gukora ivyiwe.

Mu kiganiro uwurongoye ishirahamwe OLUCOME (Observatoire de la Lutte contre la Corruption et les Malversations Economiques) yahaye abanditsi n’abamenyeshamakuru kuri uwa gatanu igenekerezo rya 31 Nzero 2014, Gabriel Rufyiri ariyamiriza abategetsi bamwe bamwe bo hejuru, harimwo n’umukuru w’igihugu asa n’uwitiranya ibikorwa vy’umuryango wiwe n’ivyo kurongora igihugu, kandi amategeko atabimurekurira.
Gabriel Rufyiri arakurira inkoni ku gishitsi abibaza ko ishirahamwe Messager FC, ikibuga c’inkino c’i Buye hamwe n’ico mu Rumonge intara ya Bururi ko vyoba ari ivya Reta. Akebura abahora bibaza ko ivyo bibuga vy’inkino vyoba ari ivya Reta ko bozeruka kuko ari ivy’umukuru w’igihugu c’Uburundi Petero Nkurunziza bwite, asanzwe ari nawe yatanguje ivyo bibuga.

Gabriel Rufyiri, arongoye ishirahamwe OLUCOME ( Observatoire de Lutte contre la Corruption et les Malversations Economiques)

Gabriel Rufyiri avuga ko mw’ishirahamwe arongoye barajwe ishinga n’ihonyangwa ry’amategeko rikorwa na Petero Nkurunziza, aho Gabriel Rufyiri afatira ku ngingo y’100 hamwe 101 zo mw’ibwirizwa shingiro zimubuza gukora ibikorwa bitari ivy’igihugu (affaires privées), kuko nk’uko Gabriel Rufyiri abisigura, abafasha Uburundi bacika abagenzi b’umuntu umwe gusa(umukuru w’igihugu Petero Nkurunziza), aho akagaruka ku mfashanyo zagiye zitangwa n’abagenzi b’Uburundi n’abandi bagwizatunga mw’iyubakwa ry’ivyo bibuga vy’inkino.

Muri iryo shirahamwe OLUCOME babandanya bagiriza ibiro vy’umukuru w’igihugu ku mfashanyo zigera ku bihumbi 800 vy’amadorare zahawe ishirahamwe Fondation Buntu ry’umupfasoni w’umukuru w’igihugu c’Uburundi Denise Nkurunziza. Icatangaje Gabriel Rufyiri n’uko iryo shirahamwe SAMANCOR ryatanze iyo mfashanyo kw’ishirahamwe rya Denise Nkurunziza ryaciye rihabwa, mu gushimirwa, mu gushimira, isoko ryo gucukura ubutare bwa Nickel i Musongati, ivyo rero bigasa no kugura akami ka muntu, canke utuganuke turoze (cadeau empoisonné).

Mw’ishirahamwe OLUCOME basaba abategetsi kwubahiriza amategeko, na cane cane ibwirizwa shingiro. Gabriel Rufyiri amenyesha ko kuva aho bandikiye amakete barambiwe, ubu bakaba bagiye kwitura sentare ijejwe kwubahiriza ibwirizwa shingiro. Basaba umukuru w’igihugu kwihanganira gukoresha mu bikorwa vy’umuryango wiwe amafaranga canke utuganuke vyagiye biratangwa n’abagenzi b’Uburundi.