OLUCOME yavuye mu migwi CECI na CEPI itegura amatora

Ishirahamwe OLUCOME ryishinze kurwanya igiturire n’isesagurwa ry’amatungo ya Reta rimenyesha ko rivuye burundu mu migwi ijejwe gutunganya amatora mu ntara no muma komine. Iryo shirahamwe rivuga ko ritashimishijwe n’inyifato itabereye yerekanwe n’umugwi CENI.

Mu kiganiro yahaye abamenyeshamukuru kuri uwu wa kabiri igenekerezo rya 11 Munyonyo 2014, umukuru wa OLUCOME, Gabriel Rufyiri yamenyesheje ko ishirahamwe arongoye rivuye burundu mu migwi ijejwe gutunganya amatora ku rwego rw’intara na komine, ariko akavuga ko bazobandanya bakurikiranira hagufi itegugwa ry’amatora.

Gabriel Rufyiri, arongoye ishirahamwe OLUCOME ( Observatoire de Lutte contre la Corruption et les Malversations Economiques)

Gabriel Rufyiri aremeza ko kuva mu ntango, CENI yari yasavye OLUCOME ko yotanga abazoyiserukira mu ntara no mu makomine, ariko akavuga ko batangaye kubona ata n’umwe ishirahamwe OLUCOME ryahawe ku rwego rw’intara, mu makomine naho bagahabwa hamwe hamwe.

OLUCOME ibandanye imenyesha ko bandikiye amakete menshi CENI bayisaba insiguro y’ukwo kutaronswa ababaserukira ku rwego rw’intara, ariko akaba ata nyishu baronse. N’abari batowe mu makomine, Gabriel Rufyiri agatanga akarorero ka komine ROHERO, aho uwari yashizwe muri CECI muri iyo komine, ku mugoroba wo kuri uwu wa mbere, yakuwe agasubirizwa. Kubwa OLUCOME, iyo nyifato ya CENI yerekana ko uwo mugwi ukorera uruhande rumwe, bakawagiriza ko witwaje ishirwamwo ry’amashirahamwe ataho yegamiye kugira uronke inzira yo gushiramwo abegamiye ubutegetsi bwa CNDD-FDD.

Umukuru w’ishirahamwe OLUCOME, Gabriel Rufyiri ahamagarira umugwi CENI kwumviriza impanuro no kwicarana n’abegwa bose n’amatora, kuko "Agasozi k’intahanugwa kahiye abagabo babona"