ONELOP : Nta nsiguro ihari y’ukugumiza Petero Karaveri Mbonimpa mw’ibohero

Ishirahamwe ONELOP ryiyemeje gucungera amatora risaba ko Petero Karaveri Mbonimpa, umukuru wa APRODH yorekurwa, kuko ata kintu na kimwe cotuma agumizwa mu munyororo. Njangwa Gilbert-Becaud arongoye ONELOP avuga ko mukurindira ko ukuri kumenyekana, Petero karaveri Mbonimpa yorekurwa akazobandanya kwitaba ubutungane yidegemvya.

Umukuru w’ishirahamwe APRODH Petero Karaveri Mbonimpa yagirizwa guhungabanya umutekano w’igihugu n’uwo hanze y’igihugu. Muvyatumye ahagarikwa, harimwo isanamu yerekanye y’urwaruka rw’abarundi rwaguye muri Repuburika iharanira intwaro rusangi ya Congo ruri mu myimenyerezo ya gisirikare, bikavugwa ko iyo sanamu yoba atari iy’ukuri, kuko abariko boba batari abarundi. Kw’itegeko rya Salvator Ndayiziga batazira "Nyamizi", Petero Karaveri Mbonimpa yaciye ajanwa mw’ibohero rikuru rya Mpimba. Mw’ishirahamwe ONELOP (Observatoire National des Elections et des Organisations pour le Progrès) bamenyesha ko ikibanza ca Mbonimpa Petero Karaveri atari mw’ibohero rya Mpimba inyuma y’ivyo yaranguye mu gihugu muri kahise gushika n’ubu akirwanira agateka ka zina muntu n’akabapfunzwe.

Njangwa Gilbert-Becaud arongoye ONELOP

Njangwa Gilbert-Becaud arongoye ONELOP amenyesha ko yisunze ibikorwa vya Mbonimpa, ubutungane bwari bukwiye kumurekura akaburana yidegemvya, mu kurindira ko ukuri kumenyekana kuvyo yagirizwa n’ivyo yashikirije. Nk’uko bibandanya bimenyeshwa na Njangwa Gilbert-Becaud arongoye ONELOP, n’aho vyoba vyarashitse uwo mutama akihenda kuri iyo sanamu kubera imyaka yiwe igeze kure, ubutungane bworaba cane cane intumbero yoba yari afise. Mw’ishirahamwe ONELOP babimenyesheje mu nama bari batunganije y’ukurabira hamwe ingene amatora yo mu mwaka w’2015 yocungerwa neza, kugira ntihazogire abasubira kuvuga ko yibwe, ari navyo bituma umutekano uca uhungabana.

Mwomenya ko mw’ishirahamwe ONELOP bamenyesheje ivyo mu gihe kuri uwu wa gatandatu hazindutse amakuru yo kwizerwa avuga ko Petero Karaveri Mbonimpa ashobora kurekurwa umwanya uwariwo wose. Amakuru ava aho nyene mw’ibohero rikuru rya Mpimba amenyesha ko kuva mu gatondo ko kuri uwu wa gatandatu, abanyororo baguma baja gushikiriza ibibazo vyabo ku bwinshi Petero Karaveri Mbonimpa, kuko nabo bumvise ko ashobora kurekurwa bitarenze ku munsi wa mbere.