ONPR na INSS bateye igikumu ku masezerano azotunganiriza abakukuruke

Ishirahamwe ritegekaniriza kazoza abakozi INSS hamwe n’ikigo ONPR bateye igikumu ku masezerano yo gutunganiriza abakukuruke (Régulariser les pensionnés).

Mu kiganiro co kuri uno wa mbere, umuyobozi w’ikigo ONPR yaratunganije ikiganiro ku banditsi n’abamenyeshamakuru, mu ntumbero yo kumenyesha ivyaranguwe n’ico gisata, muri kino gice ca mbere c’umwaka. Muri ico kiganiro yahaye abamenyeshamakuru yamenyesheje ko hakozwe ibitari bike. Mu vyakozwe, ONPR hamwe n’ishirahamwe ritegekeraniriza kazoza abakozi INSS, barateye igikumu ku masezerano azotuma abakozi bafatwa neza mu gufata agashahara kabo, bivanye n’imyaka bamaze mu kazi (carrière ).

Abakozi boba bakoze mu bisata vya Reta hamwe no mu bisata vy’abigenga ubu bazoshobora kuronka amafranga ahabwa abakukuruke angana n’imyaka yose bakoze muri vyo bisata vyose uko ari bibiri. Ariko rero amafaranga yose hamwe azoheza atangwe n’umukoresha wa nyuma. Ayo makuru yatanzwe n’umuyobozi mukuru w’ikigo ONPR (office national des pensions et risques ) Onésphore Baroreraho mu gihe batera igikumu ku masezerano n’ishirahamwe INSS.