Pakistan: icegera c’umukuru w’abatalibani yishwe

Abategetsi ba Pakistani bamenyesha ko igitero co kwica icegera c’umukuru w’abatalibani cagizwe na leta zunze ubumwe za Amerika mu Buraruko bushira Uburengero bwa Pakistani.

Abantu batandatu bakekwa ko ari aba Talibani bishwe mur’ico gitero. Abategetsi ba Pakistani bavuga ko indege igenda itarimwo umudereva yateye ibisasu bibiri vyo mu bwoko bwa missile ku nzu iri mu Buraruko bwa Wazirstan, hafi y’ urubibe na Afghansitani.

Ico gitero kibaye ica mbere kuva muri Pakistani habaye amatora mu ntango z’uku kwezi.
Mu gihe co kwiyamamaza, umushikiranganji wa mbere yatowe Nawaz Sharif yari yasavye ibiganiro na Leta zunze ubumwe za Amerika kugira ikibazo c’ibitero vy’izo ndege za drones kirangire ku butaka bwa Pakistani.