Accueil > Amakuru > Mu makungu > Parake nshasha ijejwe ubutunzi nirwanywa ry’igiturire mu Bufaransa
Parake nshasha ijejwe ubutunzi nirwanywa ry’igiturire mu Bufaransa
mercredi 10 Ndamukiza 2013
Umukuru w’igihugu c’ubufaransa yamyesheje ingingo zishingwa rya Parake nshasha ijejwe ubutunzi hamwe n’urwego rukuru rwigenga rujejwe gukurikirana ubutunzi n’inyungu z’abashikiranganji n’abandi bategetsi ba Leta.
Inyuma y’iminsi 8 gusa, Jérôme Cahuzac, umushikiranganji yarajejwe amahera ya Leta y’ubufaransa ikoresha ku mwaka atanze imihoho kubera ivyerekeye ubunyonyezi yagirijwe hamwe n’ikinyoma yabeshe imbere y’inama nshingamateka. François Holland, inyuma y’inama nshikiranganji yabaye kuruyu wa 10 Ndamukiza, yamensheje ko hagiye kuba porokorere y’igenga ajejwe gukurikirana ubutunzi bwabategetsi bo mu gihugu cose harimwo n’abashikiranganji.
«Ugukorera k’umugaragaro bitera iteka, amabwirizwa agenga ibijanye n’ubutunzi bw’abategetsi ba Leta agiye gusubirwamwo yose guhera mu mizi », ivyo bikaba arivyo umukuru w’igihugu c’Ubufaransa yashimikiyeko.
Izo ngingo zije nk’inyishu ku myidogo imaze iminsi inyuma yivyashikiye Cahuzac. Umukuru w’igihugu yongeyeko ati : umutegetsi mukuru y’igenga agiye gushirwaho. Azoba ajejwe gukurikirana n’ imenyekanishwa ry’ubutunzi bw’abategetsi imbere yuko baja mu mabanga y’igihugu n’inyuma yo kuva mu mabanga».
Luc-Noel Ingabire
