PARCEM : Ikigega FONIC caradohotse kw’ibanga ciyemeje

Ikigega FONIC kijejwe gufasha amakomine gutunganya imigambi yayo kiriko kiradohoka kuvyo ciyemeje. Amasoko atangwa ukutariko n’amahera akoreshwa n’ico kigega ntiyerekanwa neza ico yaranguye. Ivyo bikaba bivurwa n’ishirahamwe PARCEM

Faustin Ndikumana, umuyobozi w’ishiramahamwe PARCEM

Mw’ishirahamwe ryishinze gukangurira abarundi ng bahindure ingendo PARCEM, baranegura ukungene mu kigega FONIC hatangwa amasoko hatisunzwe amategeko. Ivyo bikaba bibonekera mbere mu cegeranyo c’ubugenduzi bukuru bwa reta. Faustiin Ndikumana arongoye PARCEM yibukije ko ibintu vy’abanyagihugu ari ntakomwakomwa , ari nayo mpamvu vyari bikwiye gukingirwa no kwubahirizwa na buri muntu wese.

Baravye ivyari mu cegeranyo c’ubugenduzi bukuru bwa Reta, Faustin Ndikumana amenyesha ko amafranga 271 774 765 y’amarundi ariyo yari akwiye gusubizwa, kuko ikigega FONIC kitigeze cerekana ico ayo mafranga yaranguye.

PARCEM igira iti, ibikorwa vyose vy’ukwiba, vyo kunyotora amatungo ya Reta, igiturire vyari bikwiye guhanwa hisunzwe amategeko. Basaba inzego zibijejwe gukurikiranira hafi uko amafranga akoreshwa muri ico kigega FONIC hamwe no gukurikirana mu butungane, kugira amafranga yakoreshejwe ariko adafise insiguro agarukanwe mu kigega c’igihugu.