PARCEM : Ivyashikirijwe n’inama nshingamateka y’ibihugu vya buraya ntikwabaye ukwiyadukiza

Ivyashikirijwe n’inama nshingamateka ry’abanyaburaya ku vyerekeye ifungwa rya Petero Karaveri Mbonimpa, si ukuvogera igihugu nk’uko bamwe babivuga muri kino gihe, kandi si ukwivanga mu gikorwa c’ubutungane. Faustin Ndikumana arongoye ishirahamwe PARCEM asigura ko abo bashingamateka b’ibihugu vya buraya bafise umwitwarariko udasanzwe ku bihano Uburundi bushobora gufatirwa.

Mu kiganiro n’abamenyeshamakuru co kuri uno wa mbere, igenekerezo rya 22 Nyakanga, umukuru w’ishirahamwe PARCEM (Parole et Action pour le Réveil des Consciences et des Mentalités) aragaruka ku nkomoko n’akamaro k’amasezerano y’I Cotonou. Agira ati : "Amamuko y’ayo masezerano y’i Cotonou ahera mu yandi yahuza ibihugu vya Afrika na Karaibes, mu 2000, niho rero hagiyeyo ayo yerekeye ingene ibihugu bikenye bihabwa imfashanyo n’ibihugu vy’Uburayi, hamwe n’ingene ivyo bihugu bikenye bishobora gushorera mu bihugu vya buraya bakuyeko amafaranga arihwa ku madouanes."

Faustin Ndikumana umukuru w’ishirahamwe PARCEM (Parole et Action pour le Réveil des Consciences et l’Evolution des Mentalités)

Faustin Ndikumana avuga kandi ko ayo masezerano y’I Cotonou yashizeho akabirya aho hategerezwa kubaho ugukurikirana agateka ka zina muntu, intwaro rusangi, ugutunganya ubutunzi bw’igihugu, ndetse ayo masezerano niyo nyene avuga ko hategerezwa kubaho uruhara rw’amashirahamwe yigenga mu ntwaro, hamwe n’ibiganiro. Kuvyo rero iyo nama nshingamateka y’ibihugu vy’uburaya yaraye ishikirije ku bwiwe ntibiyadukije na gato kandi si no kuvogera ubutungane, kuko kanatsinda barazi uko ubutungane bw’igihugu bwifashe, aha atanga akarorero ka ya nama rukokoma y’ubutungane yabereye mu ntara ya Gitega, aho amafaranga yakoze yatanzwe n’ibihugu vya buraya.

Ishirahamwe ry’ibihugu vya buraya rirafasha kandi igihugu c’Uburundi cane mu gutanga imfashanyo zitandukanye. Faustin Ndikumana agira ati : "Umurundi atogira umwitwarariko kuri rirya tangazo bwoba ari ubujuju." Ishirahamwe PARCEM risaba umukuru w’igihugu kugira ico kibazo rwiwe, kuko nta kintu na kimwe kiboneka gifunze Petero Karaveri Mbonimpa, cotuma igihugu kija ku nkombe, kikagira ingorane nk’izo kubera akarwi k’abantu karondera inyungu zako.