Remesha Francis-Robert yatahukanye agashimwe mw’ihiganwa rya BBIN

Ihiganwa "Shika 2013" ryari ryatunganijwe n’ishirahamwe BBIN ku rwaruka rufise imigambi yo kwiteza imbere ryasozerewe ku munsi w’ejo kuwa kabiri. Muri bahiganwe 200, abashika 20 nibo batowe mu bandi, bahabwa inyigisho zo kwitunganiriza imigambi. Batanu muribo bahawe amafaranga ashobora kubafasha gutanguza imigambi bashikirije.

Ku ncuro ya gatatu, uko umwaka utashe, ishirahamwe BBIN (Burundi Business Incubator) ryaratunganije ihiganwa ritanga akaryo ku rwaruka rwo mu Burundi ko gushira ahabona imigambi rubona ishobora kuruteza imbere, igashinga n’ubuzi ku bandi banyagihugu basanzwe badafise akazi.
Urwaruka rugera ku majana abiri nirwo rwari rwahiganye, ariko imigambi yafashwe ni mirongo ibiri gusa. Abatunganije iyo migambi yatowe barahawe inyigisho n’umurwi w’abahinga z’ingene botegura ibikorwa vyabo ku buryo n’aboyibona batohigimanga kubafata mu mugongo. Batanu muri abo mirongo ibiri Remesha Francis-Robert, Budoromyi Cynthia, Niyonzima Dylan, Nshimirimana Jean de Dieu, Nahayo Stephanie nibo batowe nk’abateguye imigambi yarushije iyindi. Baciye bahabwa agashimwe k’amafaranga ashobora kubafasha gutanguza ibikorwa vy’imigambi bashikirije.

Remesha Francis Robert, uwateguye umugambi watowe mu kibanza ca mbere yahawe ibahasha y’amafaranga imiriyoni cumi z’amarundi. Ku mugambi yatanze wo guhingura icayi gishobora kuzodandazwa mu Burundi no mu makungu, Remesha Francis Robert amenyesha ko azoshobora kwiteza imbere mu kwerekana akarusho kuvyari bimenyerewe mu rudandazwa rw’icayi. Ahamagarira urundi rwaruka kuvabanura n’ubunebwe, rwibuke ko rudashobora guhabwa akazi rwose na Reta.

Abo bashimiwe na BBIN kubw’imigambi bafise basavye amabanki kubizera mukubaronsa ingurane. Na Reta yasabwe kwama yitwararika gushigira abashoboye kwironderera ubuzi, haba mu kubaronsa ingurane, canke izindi mfashanyo.