Reta y’Uburundi yahojeje umuryango wa Patiri De Cillia Giuseppe batazira "Buyengero"

Ubushikiranganji bw’imigenderanire y’Uburundi n’ayandi makungu burahoza umuryango w’aba misiyonari b’aba "Xaveriens" wabuze umwe mubari bamaze imyaka myinshi barangura imirimo kw’izina ry’uwo muryango mu Burundi, Patiri De Cillia Giuseppe batazira "Buyengero" yitavye Imana ku munsi w’Imana mu gihugu c’Ubutariyano. Muri ubwo bushikiranganji bamenyesha ko Uburundi bubuze umukunzi w’abarundi.

Mw’itangazo ryasohowe n’ubushikiranganji bw’imigenderanire y’Uburundi n’ayandi makungu bamenyesha ko Reta y’Uburundi yakiranye umubabaro urwo rupfu, bakaba bahojeje umuryango w’aba misiyonari b’aba "Xaveriens", hamwe n’abarundi muri rusangi yafashije mu mwaka irenga mirongo itanu yamaze mu Burundi, mu bikorwa vy’iterambere ry’abanyagihugu, aho tukibutsa nk’amasengero yubatswe, amashure, ibibuga vy’umupira, ibigo, amabarabara, imifurege y’amazi hamwe n’ivuriro n’ubu rifasha abanyagihugu riri mu Kamenge, hamwe n’ibindi bikorwa vy’iterambere yaranguriye mu ntara za Bururi, Gitega, Muyinga na Cibitoke.

Patiri De Cillia Giuseppe batazira "Buyengero"

Muri iryo tangazo, Salvator NTACOBAMAZE, umunyamabanga ntayegayezwa w’ubushikiranganji bw’imigenderanire y’Uburundi n’ayandi makungu, yamenyesheje ko urupfu rwa Patiri De Cillia Giuseppe batazira "Buyengero" ari uruhombo rukomeye ku barundi, kuko yamye agaragaza urukundo abafitiye, ku buryo no mu bihe vy’intambara yabagumye hafi. Reta y’Uburundi yemeye kurungika intumwa ziyiserukira mu maziko ya Patiri De Cillia Giuseppe batazira "Buyengero", hamwe no mu nkuka y’imisa izotegurwa y’ukumuhereza Imana.

Patiri De Cillia Giuseppe "Buyengero" yavutse kw’igenekerezo rya 17 Ntwarante 1936, akaba yarungitswe mu Burundi akiri muto cane ku myaka 28 mu gihe ariho yari acatirwa mu bupatiri, mu mwaka w’1964, akorera mu Rumonge, Murago, Rumeza, Buyengero, hamwe no mu Kamenge. Yahavuye ahabwa ubwenegihugu bw’Uburundi muri Ruheshi 2011, akaba mbere yari azi neza Uburundi n’ikirundi ku buryo atari agifatwa nk’umunyamahanga. Patiri De Cillia Giuseppe "Buyengero" yitavye Imana ahitanwe n’ingwara mw’ijoro ryo ku munsi w’Imana igenekerezo rya 4 Nzero 2015 mu gihugu c’Ubutariyano i Parme, bikaba bitegekanijwe ko ashingurwa kuri uwu wa gatatu igenekerezo rya 7 Nzero 2015, inyuma y’inkuka y’imisa ibera aho mu Butariyano nyene igihe c’isaha zine z’agatondo (10heures).