Rumonge : Abanyagihugu buca biruhutsa kw’ikena ry’amazi

Amazi arakenye muri komine ya Rumonge, ivyo bigashobora gutuma indwara ziva kw’isuku rike zirandarara mu banyagihugu.

Iryo kena ry’amazi riremezwa na buramatari w’intara ya Bururi. Gloriose Nimenya akavuga ko hariko harakorwa ibishoboka vyose kugira amasoko ari mu makomine ahanamiye igisagara ca Rumonge, ashobore kuzanwa muri iyo komine. Avuga ko abagenzi b’iyo ntara bo mu gihugu c’Ubudagi, bariko barakora ibishoboka vyose kugira amasoko y’amazi yo muri komine ya Burambi na Buyengero, ashobore kumanukanwa mu gisagara ca Rumonge, ndetse umugambi wa mbere wo kumanukana ayo mazi, akavuga ko ugeze mu Gatete, muri komine ya Rumonge.

Igisagara ca Rumonge kikaba ari kimwe mu bisagara vyo hagati mu gihugu bibamwo abantu benshi. Mu gihe ico gisagara cegereye ikiyaga Tanganyika, abanyagihugu ugasanga bamwe bihereza ayo mazi, bivanye n’ubukene bw’amazi meza. Ukwo kwihereza amazi y’ikiyaga, bigatera indwara ziva kw’isuku rike, cane cane indwara z’inzoka ku bana n’abakuze.