Ruyigi : Yoba yagandaguwe azira amatati y’amatongo

Abantu n’ubu bataramenyekana nibo bagandaguye umukenyezi w’umupfakazi wo mu ntara ya Ruyigi, muri komine ya Bweru.

Mw’ijoro ryo kuwa 18 Ruheshi, niho abantu bataramenyekana bitwaje imipanga, batera umuhana w’uyo mupfakazi, baraheza basiga bamugandaguye, bamusanze aho yari asanzwe aba, ku musozi wa Nyarunazi muri iyo komine ya Bweru, intara ya Ruyigi.

Mwomenya ko amkuru ava mu ntwaro ya Ruyigi avuga ko ubwo bwicanyi bwoba bufatiye ku matati y’amatongo, umuntu umwe akekwa kuba ari mu bamutwaye ubuzima uwo mupfakazi, akaba ari mu minwe y’inyamiramabi, ku mvo z’amatohoza. Mwomenya kandi ko mu kibano co kimwe no mu muryango w’uwo yagandaguwe, bose basaba ko amatohoza ataho yegamiye yokorwa, maze abakoze ako kabi, bagahanwa bimwe vy’akarorero.