Rwanda : Umuriro wahitanye umuryango

Abantu bane bo mu muryango umwe barahitanywe n’umuriro ahitwa Gatsibo mu Buseruko bw‘igihugu c’Urwanda.

Uwo mucanwa ukaba wahitanye umugabo, umugore afise imbanyi y‘amezi umunani hamwe n’umwana yonka. Bose bakaba baciye bitaba Imana kuko uwo muriro wadutse baryamye mw ‘ijoro ryo kuwa 21 rishira uwa 22 Myandagaro 2013. Uwo muriro ukaba wavuye kw ‘isanganya nk‘uko bivugwa n’umuryango wabo bahoneye muri uwo muriro, aho bamenyesha ko uwo mushingantahe yitavye Imana yarasanzwe akora urudandazwa rw ‘amakara akaba rero yoba yari yabitse mu nzu iwe ibiti vyiciye.

Kubera batari bazimije neza amakara bariko barakoresha mw‘ijoro mu gutegura imfungurwa imbere yo kuryama, ubwo bubiko bw’ibiti n’amakara bwaciye bufatwa gushika naho inzu yose isha igatokombera. Uwo mucanwa wahitanye abantu ukaba wadutse hagati y’isaha zine n’isaha zitanu z‘ijoro. Abana batatu gusa bakuze bari baryamye mu nzu zo mu kigo zimwe bita annexes, nibo barokotse kuko batashikiriwe n’uwo mucanwa.

Umuvugizi w ‘igipolisi c’igihugu, ACP Theos Badege akaba yamenyesheje ikinyamakuru IGIHE.com mu Rwanda ko uwo muriro ari isanganya nk ‘uko vyavuzwe n’umuryango w ‘abo bahisi, ariko rero aranegura uko kwanjanjwa gutuma abantu banahasiga n’ubuzima.