Siriya : Abatavuga rumwe na Reta bahakanye kwitaba ibiganiro

Umugambwe mukuru utavuga rumwe na Reta ya Syria, National Coalition, wamenyesheje ko utazokwitaba ibiganiro vy’amahoro muri ico gihugu bizotangura i Geneve muri iyi ndwi twaraye dutanguye.

Umugambwe National Coalition wamenyesheje ivyo inyuma y’aho umunyamabanga mukuru w’ishirahamwe mpuzamakungu ONU, Ban Ki-Moon, atumiye Irani muri ivyo biganiro.

Umuvugizi w’abarwanya Reta, mu kiganiro na BBC, yamenyesheje ko Irani itari ikwiye kwitaba ivyo biganiro kubera ko ico gihugu gifise ingabo muri Syria zishigikiye umukuru w’igihugu Bashir al-Assad, kandi ko Irani itigeze ishigikira ibikorwa vyo gushiraho Reta y’imfatakibanza itarimwo umukuru w’igihugu Al-Assad.