Tasiyano Sibomana yarengutse ku matohoza y’igitero kwa Gaston Sindimwo

Tasiyano Sibomana umuvugizi wa UPRONA ishami rya Karori Nditije yarengutse mu biro vy’igiporisi vy’amatohoza BSR, aho yariko abazwa ibijanye n’ivyo yavugiye ku maradiyo ku gitero cagizwe kwa Gaston Sindimwo.

Umushingwamanza Lambert Nsabimana

Nk’uko umushingwamanza wiwe yabimenyesheje, Lambert Nsabimana avuga ko uwo aburanira yabajijwe kuri uyu wa 10 Ndamukiza uyu mwaka, icatumye avugira mu bimenyeshamakuru bitandukanye ko igitero cagizwe mu rugo rwa Gaston Sindimwo ari irementanya, agasabwa kuvuga aho ukuri kuri. Ariko rero naho uwariko agira amatohoza we yabajije ivyo yavugiye ku maradiyo, icaha co yagirizwa kikaba cariho. Ico naco, kikaba cerekeye ko yoba afise uruhara mu gitero cagizwe ku rugo rwa Gaston Sindimwo, umwe mu banywanyi bakomeye muri UPRONA ishami rya Konsiriya Nibigira.

Ariko rero uwuburanira Tasiyano Sibomana avuga ko icaha akurikiranwako atigeze akibazwako, akaba yabazwa gusa ku bijanye n’ivyo yashikirije, ari naco gituma Lambert Nsabimana yibaza ko uwugira amatohoza atagaciro yabihaye. Amenyesha ko ivyo Tasiyano Sibomana yavuze ku maradiyo, yabishikirije nk’umuvugizi w’umugambwe na cane cane ko ako kabi Gaston Sindimwo yari yakagirije Abadasigana ba UPRONA. Tasiyano Sibomana akaba yaciye asabwa kuzogaruka ku munsi wa mbere, igenekerezo rya 14 Ndamukiza uyu mwaka.

Tasiyano Sibomana ahejeje kubonana na OPJ

Mu kamenya ko Tasiyano Sibomana arengutse mu gihe kuri uyu wa gatatu igenekerezo rya 9 Ndamukiza, hari aba JRR babiri Ninteretse Lionel atwara JRR muri komine ya Kanyosha na Shurweryimana Fabrice, batwariwe mw’ibohero rikuru rya Mpimba mu kurindira ico amatohoza avuga ku bijanye n’ico gitero.