Tchad : Abasirikare bavuye muri Centrafrika

Abasirikare b’igihugu ca Tchad bariko barava mu gihugu ca Centrarfrika nk’uko bari babivuze, kuva aho bagirijwe gucucagira amasasu mu banyagihugu.

Abasirikare b’igihugu ca Tchad rero bakaba bariko barava muri ico gihugu mu gihe bariko barafashanya n’abandi basirikare bahurikiye muri MISCA, mu ntumbero yo gufasha ico gihugu kuronka amahoro, nk’uko bivugwa na général Martin Tumenta Chomu atwara abasirikare ba MISCA. Mu gihe abo basirikare ba Tchad bagiye, igihugu ca Centrafrika gica gihomba abasirikare bashika kuri 850, bari basanzwe bacungereye uturere two mu Buraruko nka Bossangoa, Bouca, Batangafo, Kaga Bandoro, Ndélé, Kabo na Dekoa.

Général Tumenta Chomu, akaba asaba ko abo basirikare bosubirizwa mu maguru masha, kugira ubwo burere ntibuhave bwigarurirwa n’inkozi z’ikibi. Ariko akaba avuga ko ivyo bizokunda bivanye n’uko ibihugu bisanzwe biriko birafasha ico gihugu ca Centrafrika bibifashe, canke ikindi gihugu carico cose.

Abasirikare b’igihugu ca Tchad rero bariko basubira iwabo, bikaba vyitezwe ko bazakirwa mu gihugu iwabo kuri uyu wa gatatu igenekerezo rya 16 Ndamukiza uyu mwaka, mu Bumanuko bwa Tchad nk’uko bivugwa na Hassan Sylla umushikiranganji wo kumenyesha amakuru muri ico gihugu. Abo basirikare bakazoca basubira mu makambi bari baje bavamwo.