Accueil > Amakuru > Poritike > Thérence Sinunguruza agiye kwitura urwego rujejwe gutatura amatati mu (...)
Thérence Sinunguruza agiye kwitura urwego rujejwe gutatura amatati mu mugambwe UPRONA
mercredi 9 Gitugutu 2013
Icegera c’umukuru w’umugambwe UPRONA mu ntara ya Bujumbura Mairie Francis Ngaruko aranegura ingingo yafatiwe icegera ca mbere c’umukuru w’igihugu Thérence Sinunguruza yo kumukurako icizere, bagasaba umukuru w’igihugu kumusubiriza. Kubwiwe, iyo ngingo ntiyubahirije amategeko kuko urwego nyobozi rwose rw’umugambwe UPRONA rutagishijwe inama.
Ku genekerezo rya 5 Gitugutu 2013, mu rwandiko rwasotse ruteweko umukono n’umukuru w’umugambwe UPRONA, icegera ciwe Felix Mboneko n’umunyamabanga mukuru w’uwo mugambwe Gaston Sindimwo, basavye umukuru w’igihugu gusubiriza Thérence Sinunguruza, icegera c’umukuru w’igihugu kuko bamwagiriza kutaba ariko araserukira umugambwe, kandi ko yoba ashira imbere inyungu ziwe. Bukeye rimwe gusa, ibiro vy’icegera ca mbere c’umukuru w’igihugu vyaciye navyo bisohora urwandiko bimenyesha ko abateye umukono kuri urwo rwandiko bafise izindi mvo zitaramenyekana.
Francis Ngaruko, icegera c’umukuru w’umugambwe UPRONA mu ntara ya Bujumbura Mairie yamenyesheje ko iyo ngingo y’ubuyobozi bw’umugambwe UPRONA itisunze amategeko, kandi ko urwego nshingwabikorwa rw’umugambwe rutagishijwe inama rwose, co kimwe n’urwego rujejwe gutatura amatati. Kubwa Francis Ngaruko, n’aho ivyo Thérence Sinunguruza yagirizwa vyoba arivyo, yai guhabwa umwanya w’ukwisigura imbere y’inzego z’umugambwe zibifitiye uburenganzira, imbere y’uko afatirwa ingingo.
- Catherine Mabobori, umuvugizi w’icegera ca mbere c’umukuru w’igihugu
N’aho atashize ahabona imvo bavuga ko ziri inyuma y’ivyagirizwa icegera ca mbere c’umukuru w’igihugu, Catherine Mabobori, umuvugizi w’icegera ca mbere c’umukuru w’igihugu, mu kiganiro yahaye abamenyeshamakuru mu gatondo ko kuri uyu wa gatatu yamenyesheje ko Thérence Sinunguruza agiye kwitura urwego rw’umugambwe rujejwe gutatura amatati.
Ku ruhande rw’ibiro vy’umukuru w’igihugu bamenyesha ko hataragera ko bagira ico babivuzeko. Léonidas Hatungimana, umuvugizi w’umukuru w’igihugu, ahamagawe na bagenzi bacu bo ku nsamirizi Isanganiro yamenyesheje ko umukuru w’igihugu ativanga mw’itunganwa ry’imigambwe.
Egide Nduwimana
