Kirundo : Uwurongoye ishirahamwe Apecoev Safavo arabangamiwe n’abamutera ubwoba

Therence Nzohabonayo arongoye ishirahamwe Apecoev Safavo mu ntara ya Kirundo amenyesha ko umutekano wiwe wifashe nabi, kuva aho atanguriye urugamba rwo gushengeza abashurashuza abana biga mu mashure mato n’ayisumbuye.

Uwo asanzwe ari muri iryo shirahamwe riharanira agateka ka zina muntu, akaba yabariye ikinyamakuru IGIHE ko ku musi wa mbere w’indwi iheze, kuri parake ya Kirundo, aho yari yayituye kugire atunge agatoke ubukozi bw’ibibi bukorererwa abana b’ibigeme bari mu mashure bukorwa n’imirwi itandukanye igizwe ahanini n’abatwara amapikipiki, abamwa imishatsi canke bagasokoza imishatsi, abakora mu mazu y’ubunywero hamwe n’abadereva, aho abo bari kumwe muri iryo shirahamwe bari bafise na bimwe mu vyemeza nk’amajwi, iterefone hamwe n’amaketi yandikwa, umushikirizamanza mukuru w’intara ya Kirundo, ubwiwe bagiye bagana, aho kubumviriza akaba yashotse abatera ubwoba, ndetse abaka n’igikoresho cabo bakoresha mu kazi.

Abo bari muri iryo shirahamwe bakagirizwa n’umushikirizamanza ko batangaza amabi akorerwa muri iyo ntara, agirako mbere abagiriza ko bamutuka, ariko araheza arabarekura, barataha n’igikoresho cabo arakibaha. Therence Nzohabonayo akavuga ko bariko baragirwako iterabwoba, bahamagarwa n’inomero batazi, mbere muri kano gatondo ko kuri uyu wa mbere, Therence Nzohabonayo akaba yahawe umutahe igihe c’isaha 11 z’ubuca, aho aza kwitaba mu biro inomero zibiri, uwo mutahe kandi ukaba wasohowe ku wa 15 Nzero.

Uwo munyagihugu akavuga ko bimwe muvyo ariko arazira, ari ingendo ahora agira mu mabohero atandukanye araba ibihe abariyo bamaze, hamwe n’ukuvuga bamwe mu bahohoterwa bazira ivyiyumviro vyabo vya poritike. Uwo munyagihugu ariko akavuga ko arindiriye kugira arabe ihamagarwa ryiwe, ko atayindi ntumbero yoba iryinyegeje inyuma. Tukaba turiko turagerageza kurondera umushikirizamanza wa Repuburika mu ntara ya Kirundo, ariko ntituramuronka.