Tunisie: Ishingurwa rya Chokri Belaid

Abanyetuniziya ibihumbi n’ibihumbi bitavye ishingurwa ry’umukuru w’abatavuga rumwe na Reta, Chokry Belaid yagandaguwe.

Isinzi ry’abantu ku murwa mukuru, Tunis, baririmba ivyivugo vyiyamiriza Reta itwawe n’abagendera ku vyiyumviro vya Islam, igihe isandugu irimwo umuhisi yajanwa kw’itongo ry’abapfuye, ipfutswe n’ibendera ry’igihugu.

Abasirikare n’abapolisi bakumira akaguma bashizwe hirya no hino mu gihugu, nyuma y’itana mu mitwe ry’ejo kuwa Kane.

Mu muji wa Gafsa uri mu bumanuko, igipolisi carashe ivyuka bikoroza amasozi mu gushwiragiza abari mu myiyerekano yo kwiyamiriza Reta, bariko baratera amabuye ibiro bikuru vy’igipolisi muri uwo muji.

Ubuzi bwinshi bw’abikorera utwabo n’abakorera Reta bwugaye, mugihe amashirahamwe y’abakozi yahamagaje ihagarikwa ry’akazi rusangi.