Tuniziya : Abantu 12 bacunga umutekano w’umukuru w’igihugu baguye mu gitero

Abantu 12 bari mu bacungera umutekano w’umukuru w’igihugu ca Tunizia basize ubuzima mu gitero cakozwe ku muduga barimwo, mu gisagara ca Tunis. Ico gihugu cafashe ingingo zidasanzwe.

Ingingo y’ibihe bidasanzwe yafashwe inyuma y’igitero cakozwe mu gisagara ca Tunis, ku modoka (Bus) yarimwo abantu bacunga umutekano w’umukuru w’ico gihugu, cumi na babiri baca baritaba Imana, abandi cumi na batandatu barakomereka, mw’ijoro ryo kuri uwu wa kabiri, igihe imodoka barimwo yaterwa igisasu.

N’aho atawuriyemerera ko ariwe yakoze ico gitero, bivugwa ko coba cakozwe n’abo mu murwi witwaza ivyiyumviro vya islamu.

Abo bagirizwa nibo bakekwa ko bari inyuma y’ibitero vyinshi vyabaye mu ntango z’uwu mwaka w’2015, mu bisagara vya Tunis na Sousse, abantu benshi barahasiga ubuzima, harimwo n’abanyamahanga.