Turkiya : Abashatse guhirika ubutegetsi babandanya kuronderwa

Abategetsi bo muri Turkiya bari mu gikorwa c’ukurondera mu bigo vya gisirikare mu gihugu hose abashigikiye igikorwa caburijwemwo co guhirika ubutegetsi, kuri uwu wa gatanu.

Ni muri urwo rwego, umwe mu bayobozi b’igisirikare n’abandi basirikare 50 batawe muri yompi mu gisagara ca Denizli.

Gushika ubu abasirikare bamaze gutabwa muri yompi baharurwa mu bihumbi, nayo abacamanza hafi ibihumbi bitatu birukanwe mu kazi.

Umukuru w’igihugu Recep Tayyip Erdogan yavuze ko inama nshingamateka iziga namba hojaho igihano c’ugupfa.

Abatawe muri yompi bagirizwa kuba abayoboke b’umuvugabutumwa aba muri Amerika, yitwa Fethullah Gulen, uwo nawe Reta ikaba imwagiriza kuba yari inyuma y’uwo mugambi wo guhirika ubutegetsi waburijwemwo, ariko akaba abihakana.

Reta zunze ubumwe za Amerika zasavye Turkiya kwubahiriza amategeko mu maperereza ajanye n’ico gikorwa co kugerageza guhirika ubutegetsi.