Ububirigi : Umugambwe MSD watanze ubutumire bw’ibirori vy’uguhimbaza imyaka itanu umaze

Mu gihe umugambwe MSD uriko witegurira guhimbaza isabukuru y’imyaka itanu umaze wemerewe gukora ku mugaragaro, ubuserukizi bw’uwo mugambwe mu Bubirigi bwatumiye abanywanyi ba MSD n’abandi bose bavyipfuza, mu birori vy’ukwiginana n’ugukurikira ijambo Alexis Sinduhije azoshikiriza mu kibanza ca PARK NOORD i Anvers.

Abanywanyi b’umugambwe MSD mu Bubirigi hamwe n’abo mu bihugu vya Buraya, biteguriye guhimbaza imyaka itanu umugambwe MSD umaze ukorera ku mugaragaro. Ibirori bizoba kuri uwu wa gatandatu igenekerezo rya 19 Mukakaro 2014, i Anvers mu kibanza c’ahitwa PARK NOORD, 2060, hakazoba ari kw’isaha umunani (14heures).

Mu butumire bwasohotse kuri uwu wa mbere, umugambwe MSD uhamagarira abanywanyi bawo, aba ADC Ikibiri n’abandi bose bavyipfuza kuzokwishikira mu Bubirigi muri ico kibanza ca PARK NOORD, 2060, mu birori bizotanguzwa n’urugendo (manifestation), bisozerwe n’ijambo rizoshikirizwa na Alexis Sinduhije, umukuru w’umugambwe MSD. Abafise ivyo babaza, basabwe guhamagara abantu bakurikira kuri izi nimero :

Aimé-Napoléon BUCUMI : +32 476 78 65 78

François NSABIMANA : +32 486 95 51 01

Tubibutse ko n’ibihano uwo mugambwe wari wafatiwe vy’ukumara amezi ane udakora vyaheranye n’uwu munsi wa mbere igenekerezo rya 14 Mukakaro 2014. Nk’uko biri mw’itangazo ry’ubushikiranganji bw’intwaro yo hagati mu gihugu, kuva kuri uwu wa kabiri igenekerezo rya 15 Mukakaro 2014, uwo mugambwe MSD urarekuriwe gukorera ku mugaragaro ibikorwa vyawo vya poritike.

Muri iryo tangazo ry’ubushikiranganji bw’intwaro yo hagati mu gihugu, barashimira indongozi z’umugambwe MSD ku bwitonzi zerekanye mu kwubahiriza ingingo umugambwe MSD wari wafatiwe, bakaboneraho n’akaryo ko guhamagarira abajejwe intwaro mu gihugu cose kuzokworohereza ibikorwa vy’uwo mugambwe kuva kw’igenekerezo rya 15 Mukakaro 2014.