Ubufaransa bwasavye ko agateka ka Petero Karaveri Mbonimpa kubahirizwa

Igihugu c’ubufaransa cerekanye amakenga gifise ku magara ya Petero Karaveri Mbonimpa abandanya gusinzikara mu bitaro BUMEREC aho agira akwize indwi ariyo arwariye. Ubufaransa bugasaba ko yohabwa uburenganzira arekurirwa n’amategeko y’igihugu na mpuzamakungu Uburundi bwateyeko umukono.

Petero Karaveri Mbonimpa, ku buriri bw’ibitaro BUMEREC

Mw’itangazo ryasohowe n’ubushikiranganji bw’imigenderanire y’Ubufaransa n’ayandi makungu, bamenyesha ko barajwe ishinga n’amagara ya Petero Karaveri Mbonimpa atifashe neza mu bitaro amazemwo iminsi indwi kuva kuwa gatanu w’indwi iheze.
Ubufaransa bumenyesha ko bwipfuza ko Petero Karaveri Mbonimpa, uwo aharanira agateka ka zina muntu apfunzwe, yohabwa uburenganzira bwose arekurirwa n’amategeko y’Uburundi na mpuzamakungu igihugu c’Uburundi cateyeko umukono.
Igihugu c’Ubufaransa cibutsa ko gisanzwe giharanira uburenganzira bw’ugushikiriza ivyiyumviro kw’isi yose, kikibutsa kandi ko gikurikiranira hafi iyubahirizwa ry’amategeko mu manza zicibwa.

Laurent Fabius, umushikiranganji w’imigenderanire y’Ubufaransa n’ayandi makungu

Tubibutse ko umukuru w’ishirahamwe APRODH, Petero Karaveri Mbonimpa, kuwa gatanu igenekerezo rya 29 Myandagaro 2014, yaraye mu bitaro BUMEREC biri mu gisagara ca Bujumbura. Yakuwe mw’ibohero rikuru rya Mpimba, kuko yari akitswe n’amagara kubera ingwara y’igisukari (Diabète) asanzwe arwaye haraheze imyaka ine. Imbere y’uko ajanwa mu bitaro BUMEREC, abamuburanira bagumye basaba ko yorekurwa vy’agateganyo, akaburana yidegemvya, kuko akitswe n’amagara, kandi akaba arenza imyaka 60. Abo baburanira Petero Karaveri Mbonimpa bagumye bibutsa itegeko ry’umushikiranganji ryo kuwa 27 Myandagaro 2014 rivuga ko umupfungwa arenza imyaka 60, kandi akaba arwaye ingwara idakira, ko ategerezwa guca ahabwa umwidegemvyo w’agateganyo, akaburana yidegemvya. Umushingwamanza Antoine Nzobandora yabwiye abacamanza ko Petero Karaveri Mbonimpa arwaye ingwara y’igisukari (Diabète) amaranye imyaka ine, akaba kandi arenza iyo myaka 60 ivugwa muri iryo tegeko ry’umushikiranganji w’ubutungane.

N’aho abo bashingwamanza bagumye berekana ko Mbonimpa akitswe n’amagara, bakamusabira umwidegemvyo w’agateganyo mu kwerekana iryo tegeko ry’umushikiranganji w’ubutungane ryotuma Petero Karaveri Mbonimpa arekurwa sentare yafashe ingingo yo kumugumiza mu munyororo. Petero Karaveri Mbonimpa kuri uwu wa kane akwije iminsi 114 ari mu mvuto, akaba yahagaritswe kw’igenekerezo rya 16 Rusama 2014 yagirizwa guhungabanya umutekano w’igihugu n’uwo muri Repuburika iharanira intwaro rusangi ya Congo. Yarungitswe mw’ibohero rikuru rya Mpimba kw’itegeko rya Salvator NDAYIZIGA batazira Nyamizi, icariho c’umushikirizamanza wa Repuburika mu gisagara ca Bujumbura.