Uburundi bwafatiwe ibihano n’ishirahamwe ry’Afrika ry’urukino rwa Basketball

Ishirahamwe ry’umupira w’amaboko "Basketball" ryaciwe ihadabu n’ishirahamwe ry’urwo rukino muri Afrika. Ingaruka mbi ni nyishi zizokwirikira iryo hadabu.

Inyuma y’aho umurwi nserukira gihugu w’Uburundi mu mupira w’amaboko "Baskball" usibiye mu nkino z’akarere ka gatanu, ng’ivyo ibihano birakorotse. Ihadabu ringana ibihumbi 29 vy’amadorari (29 $) y’abanyamerika ryaciriwe ishirahamwe rya "Basketball" ryo mu Burundi.

Iruhande y’iryo hadabu, izindi kwirikizi zishobora gukwirikira ico gihano, n’uko ishirahamwe rishobora kutaronka imfashanyo y’imiriyoni 80 (80 Euros) ryari ryemerewe n’Ubumwe bw’abanyaburayi (Union Europeenne). Ikindi n’uko n’umurwi w’Urunani ushobora gukurwa ku rutonde rw’imirwi izoja mu mahiganwa y’imirwi yabaye iya mbere iwabo. Ivyo vyose vyatumwe n’uko umurwi nserukira gihugu w’Uburundi w’umupira w’amaboko utitavye inkino, kandi wari wiyandikishije.

Herman arongoye ishirahamwe ry’umupira w’amaboko mu Burundi avuga ko umurwi nserukiragihugu w’Uburundi, iyo witaba ayo mahiganwa, wari gukoresha amafaranga make agereranije n’iryo hadabu ringana ibihumbi 29 vy’amadorari Uburundi buzoca butanga.

Tubibutse ko ikibazo c’uko uburyo butabonetse arico catumye Uburundi busiba inkino z’imirwi nserukira gihugu yo mu karere ka gatanu ziriko zibera mu gihugu c’Ubuganda.