Uburundi na Côte d’Ivoire bipfuza gukomeza imigenderanire mu gisata c’umutekano

Umushikiranganji w’umutekano, Gabriel Nizigama yaramenyesheje ku munsi w’ejo kuwa gatatu ko hariho ugushaka gufashanya mu gisata c’umutekano hagati y’Uburundi na Côte d’Ivoire.

Gabriel Nizigama asanzwe ari mu rugendo mu gihugu ca Côte d’Ivoire yaragiranye imibonano n’abapolisi b’abarundi bari muri ico gihugu, hamwe n’abapolisi ba Côte d’Ivoire, bakaba baganiriye uko botezanya imbere mu migenderanire bafitaniye mu gisata c’umutekano. Umushikiranganji Gabriel Nizigama akaba yaranezerejwe n’ukugendera abapolisi b’abarundi bari mu bikorwa vya ONU mu mugambi UNPOL usanzwe ujejwe kugarukana n’ugutsimbataza amahoro muri Côte d’Ivoire, bari kumwe n’abandi bapolisi n’abasirikare bo mw’ishirahamwe mpuzamakungu ONU.

Mu gihe n’Uburundi bwahoze mu ndyane zakwezwe n’intambara, umushikiranganji Gabriel Nizigama yasavye abo bapolisi b’abarundi gukorana neza na bagenzi babo mu mirimo bajejwe kugira n’ico gihugu kigenzi c’Uburundi gishobore kuronka amahoro.

Urwo rugendo umushikiranganji Gabriel Nizigama arugize inyuma y’izindi zagiye zirakorwa n’abategetsi bandi b’abarundi mu ntumbero yo gukomeza imigenderanire y’Uburundi na Côte d’Ivoire. Kw’igenekerezo rya 21 Ruhuhuma 2013, mu gisagara ca Abidjan, umushikiranganji w’imigenderanire y’Uburundi n’ayandi makungu, Laurent Kavakure yarahawe umubonano na Daniel Kablan Duncan, umushikiranganji wa mbere wa Côte d’Ivoire, bompi bakaba baganiriye ku migenderanire y’ibihugu vyabo, ugufashanya bishimikiye ku gisata c’uburimyi, igisata c’ubuvuzi n’ugufashanya mu bijanye n’inyigisho za kaminuza.