Ubuserukizi bw’Uburundi muri Libye bwugawe

Reta y’Uburundi yafashe ingingo y’ukwugara ubuserukizi bwayo mu gihugu ca Libye ku mvo z’umutekano. Mu bushikiranganji bw’imigenderanire y’Uburundi n’ayandi makungu bmenyesha ko bazosubira kwugurura nibabona umutekano wifashe neza.

Abakozi b’ubuserukizi bw’Uburundi mu gihugu ca Libye basabwe kugaruka mu Burundi kuko ubwo buserukizi bwugawe vy’agateganyo ku mvo z’umutekano. Mu bushikiranganji bw’imigenderanire y’Uburundi n’ayandi makungu bamenyesha ko amakete asaba ko abo bakozi kugaruka yabashikiriye kuva kw’igenekerezo rya 23 Rusama 2014. Ubwo buserukizi bukaba buzosubira kwugururwa umutekano muri ico gihugu niwagaruka.

Mwomenya ko n’ibindi bihugu vyari bisanzwe bifise ubuserukizi muri Libye vyamaze gutumako abakozi bavyo, abandi nabo bakaba bungururijwe gukorera mu bihugu vyegereye Libye nka Tunisie, Algerie.