Ubuyapani bwatanze imfashanyo ingana imiliyoni 7.4 z’amadolari

Uburundi, biciye ku mushikiranganji ajejwe imigenderanire n’ibindi bihugu, ahajeje gutera umukono ku masezerano y’imfashanyo itanzwe n’igihugu c’Ubuyapani ingana n’imiliyaridi 11,5 z’amafaranga y’amarundi ; iyo mfashanyo ikaba izokora mu bijanye n’ibitoro.

Umushikiranganji w’imigenderanire n’ibindi bihugu, Laurent Kavakure hamwe n’uwuserukira igihugu c’ubuyapani hano mu Burundi Takata Toshihisa, nibo bateye umukono kuri ayo masezerano.

Iyo ikaba ibaye imfashanyo igira kabiri Leta y’Ubuyapani ihaye Uburundi mu bijanye n’ibitoro kuva mu mwaka w’2009, inyuma y’iyindi ingana imiliyalidi cumi z’amafaranga y’amarundi yatanzwe mu gisata c’ibifungurwa yateweko umukono kuwa 12 Ruhuhuma 2013 i Bujumbura.

Ayo masezerano yatereweko umukono mu gisagara ca Nairobi mu gihugu ca Kenya, aho uwuserukira igihugu c’ Ubuyapani yibukije ko igihugu ciwe gishima intambwe Leta y’Uburundi n’abanyahihugu bayo bateye mu kurwanya ubukene no guteza imbere ubutunzi bw’igihugu.