Uganda : Abamenyeshamakuru babujijwe kuvuga ibikorwa vy’umugambwe FDC

Ubutegetsi bwa Uganda bwamenyesheje ko buzofatira ibihano bikomeye abamenyeshamakuru bazoshikiriza amakuru yamamaza ibikorwa vy’umugambwe FDC utavuga rumwe n’ubutegetsi bw’umukuru w’igihugu Kaguta Yoweri Museveni. Bimwe mu bihano bizofatwa na Reta ya Uganda akaba ari ukwaka umumenyeshamakuru uburenganzira bwo gukora canke gupfunga umumenyeshamakuru azoba yarenze kuri iyo ngingo.

Abatavuga rumwe n’ubutegetsi muri Uganda bamaze iminsi batana mu mitwe n’igiporisi, kuva habaye amatora y’umukuru w’igihugu muri Uganda igenekerezo rya 18 Ruhuhuma 2016, amatora yatsinzwe na Yoweli Kaguta Museveni, n’aho abatavuga rumwe nawe biyamiriza ivyavuye muri ayo matora.

Abategetsi n’abanywanyi b’umugambwe FDC utavuga rumwe n’ubutegetsi bwa Uganda bari bateguye kuri uwu wa kane imyiyerekano yo gusaba ko hasubira gusuzumwa ibiharuro vyavuye mu matora, ariko igiporisi kikaba kitabahaye agahengwe.

Abaporisi benshi bari bameze magabo mu mabarabara ya Kampala kugira baburizemwo iyo myiyerekano, tukabibutsa ko umukuru w’uwo mugambwe FDC, Kizza Besigye, agipfunzwe ic’amaso, ku rugo iwe.

Nk’uko bivugwa na VOA dukesha iyi nkuru, umushikiranganji wo kumenyeshamakuru yaciye atunganya ikiganiro kuri uwu wa kane, akaba yafashe ingingo ko ibinyamakuru bibujijwe gutangaza amakuru ku bikorwa vy’umugambwe FDC, kandi ko uwo mugambwe utarekuriwe gutunganya ibiganiro ku bamenyeshamakuru hamwe n’ibindi biganiro.

Bimwe mu bihano bizofatwa na Reta ya Uganda akaba ari ukwaka umumenyeshamakuru uburenganzira bwo gukora canke gupfunga umumenyeshamakuru azoba yarenze kuri iyo ngingo.