Ugusubiza hamwe kwa UPRONA kwoba kwaraciye imigongo abatari bake

Ugusubiza hamwe kw’abahora badacana uwaka mu mugambwe w’Adasigana UPRONA kwarababaje bimwe bivuye ku mutima umugambwe uri ku butegetsi CNDD FDD, n’ikimenyamenya akaba ari urubanza abo badasigana bari basanzwe bafise muri sentare ntahinyuzwa rwoba rugira rucibwe, kandi abo badasigana bararusokoye mu butungane, nk’uko vyamenyeshejwe n’umukuru w’umugambwe UPRONA Karori Nditije, mu kiganiro yahaye abanditsi n’abamenyeshamakuru.

Muri ico kiganiro co kuri uyu wa 28 Nzero umwaka w’2014 "Ku Mugumya", Evariste Ngayimpenda yari asanzwe arongoye umurwi wiyemeje kwambika umutamana UPRONA, yicaranye n’umushingamateka Karori Nditije arongoye umugambwe UPRONA, bakaba batariye umunwa mu kwagiriza bamwe mu badasigana nk’umushingamateka Niyoyankana Bonaventure yahoze arongoye umugambwe na Gaston Sindimwo umunyamabanga mukuru w’uyo mugambwe kuba barahemutse, bakaba ari ibikoresho vy’umugambwe uri ku butegetsi CNDD-FDD mu gushaka kugumiza abadasigana mu ndyane zidahera.

Evariste Ngayimpenda yambaye ishati yera, nayo Karori Nditije ari hirya yiwe

Umukuru w’umugambwe ari kumwe na Ngayimpenda, bakaba bamenyesha ko bagiye kuvugitira umuti abo bahemutse, bakabavuga hose ukwo bari, bakamenyekana. Ariko rero bikavugwa ko atari abo babiri gusa, hari n’abandi ndetse basanzwe bari no mu nzego nkuru z’igihugu, boba bariko barafashanya na Sindimwo na Niyoyankana. Amakuru twahawe na bamwe mu badasigana bari aho ku Mugumya, akavuga ko muri uyo murwi w’abadashaka ko abadasigana bosubirana, harimwo nk’umushikiranganji w’iterambere ry’amakomine Jean Claude Ndihokubwayo hamwe na Teresiyo Sinunguruza yahoze ari icegera ca mbere c’umukuru w’igihugu, we ndetse yoba ari navyo yazize, mu gukurwa mu mabanga yo kuba icegera ca mbere c’umukuru w’igihugu c’Uburundi.

Felix Mboneko yambaye ishati ishaka kwirabura, akaba ari icegera c'umukuru w'umugambwe UPRONA

Abo badasigana rero badashigikiye ugusubiza hamwe kw’umugambwe wa Rwagasore boba baracitse umugongo, abarongowe na Ngayimpenda basubiranye n’abo kwa Nditije, bakaba bipfuza kubandanya bakurikirana urubanza ruri muri sentare ntahinyuzwa bafashijwemwo na CNDD FDD, kugira abarongoye umugambwe ubu bace bakomborwa, umugambwe uheze usubizwe umushingamateka Niyoyankana Bonaventure afashijwe na Gaston Sindimwo n’abandi bacuditse hamwe n’ubutegetsi bwa CNDD FDD, mu gutegura ayandi matora, amatora ashobora kuzana uworongora uyo mugambwe akomera amashi CNDD FDD mu kwaha kwawo, akawushigikira mu kiringo kigira gatatu ca Petero Nkurunziza hamwe n’itegeko rishasha rigenga umurwi CNTB, itegeko rivugwa ko ari inkingi y’umugambwe uri ku butegetsi mu matora yo mu mwaka w’2015. Uwo yipfuzwa n’umugambwe uri ku butegetsi kugira aze kubafasha ivyo vyose, bikavurwa ko yoba ari Niyoyankana Bonaventure yahoze arongoye UPRONA.

Tukabamenyesha ko muri ico kiganiro, umugambwe UPRONA wamenyesheje ko wiyamirije wivuye inyuma ico cose cotuma umukuru w’igihugu Petero Nkurunziza asubira kwitoza ubugira gatatu, ndetse bakavuga ko itegeko rishasha rigenga umurwi CNTB batarota barishigikira. Abo badasigana bakarangiza bavuga ko "imihimbiri, abasuma n’abambuzi eka na ba mpema yuzuye canke ba mpemuke ndamuke" bagiye kubarwanya, nk’uko umuganwa atari umugani Rudoviko Rwagasore yabishikirije mw’ijambo ryiwe.