Uhuru Kenyatta yagendeye ubwa mbere Sudani yo mu Bumanuko kuva habaye imishamirano

Umukuru w’igihugu ca Kenya, Uhuru Kenyatta ahanura indongozi zo muri Sudani yo mu bumanuko gushira mu ngiro amasezerano y’amahoro bateyeko igikumu mu mwaka uheze, hamwe n’ukugarura umutekano mu gihugu.

Uhuru Kenyatta yabishikirije mu rugendo yagize i Juba kuri uwu wa kabiri. Niwe mukuru w’igihugu wa mbere akigendeye kuva aho habereye gucanamwo hagati y’abasirikare bayoboka umukuru w’igihugu Salva Kiir n’abayoboka uwahoze ari icegera ciwe, Riek Mashar.

Urwo rugendo rwaje rukurikira urugendo icegera ca mbere gishasha c’umukuru w’igihugu, Taban Deng Gai yagize muri Kenya mu ntango z’uku kwezi kw’indwi, aho yari yagiye gusaba umukuru w’igihugu Uhuru Kenyatta, kubafasha gushika ku mahoro arama.

Nk’uko tubikesha VOA, Kenya ni kimwe mu bihugu bibanyi cemeye gutanga abasirikare ibihumbi bine mu basirikare bemejwe n’inama ya ONU ijejwe umutekano kuzorungikwa muri Sudani yo mu bumanuko kugarukana umutekano.