Umugambi wo kurihisha itagisi imwe ku mbibe ugiye gutangura

Ubushikiranganji bujejwe ibikorwa vy’akarere k’Afrika y’Ubuseruko bwaratunganije uruganda rwo kumenyesha no guhimiriza ku vyerekeye itangura ry’umugambi wo kurihisha ikori rimwe ku mipaka, ku bihugu (territoire douanier unique) vyose biri mu karere k’Afrika y’Ubuseruko biitegekanijwe gutangura mu kwezi kwa Nzero 2014.

Urwo ruganda rwuguruwe n’umushikiranganji ajejwe ibikorwa vyo mu karere k’Afrika y’Ubuseruko Léontine Nzeyimana. Muri urwo ruganda, hakaba hari hatumiwe abarongoye ibisata bitandukanye vya Reta, abaserukira abasanzwe bafasha ubwo bushikiranganji, abari mu mashirahamwe adaharanira ivyicaro vya poritike hamwe nabo mu mashirahamwe yigenga.

Umupfasoni Léontine Nzeyimana yamenyesheje ko inama idasanzwe igira 15 y’abakuru b’ibihugu bo mu karere k’Afrika y’Ubuseruko yabaye ku wa 30 Munyonyo 2013, basavye ko igice ca mbere c’uwo mugambi cotangurana n’igenekerezo rya 1 Nzero 2014, kandi ko bokora ibikenewe vyose kugira mu kwezi kwa Ruheshi uzobe wagiye mu ngiro.

Uburundi buriteguye, umunyamabanga ntayegayezwa muri ubwo bushikiranganji, Yohani Rigi avuga ko uwo mugambi wahaririwe bikwiye mbere n’abahinga b’abarundi barafashije. Yongeyeko kandi ko uwo mugambi ari intambuko ya nyuma kugira hagere gukoresha itagisi Imwe ku mbibe zo muri kano karere k’Afrika y’Ubuseruko. Inkingi zishingiye ko gutangisha iryo tagisi rimwe, akaba ari kureka uruja n’uruza rw’ibidandazwa muri ivyo bihugu biri muri ako karere, hari ikindi co gutunganya amakori.

Yohani Rigi arangiza avuga ko uwo mugambi ufise inyungu nyinshi, ivyo kurihisha amatagisii amwe bizotuma ivyo guhanahana ibidandazwa binyaruka, gukuraho abarenga imbibe badatanze amatagisi, n’ibindi. Bizotuma kandi ivyo guteshumwanya baca ahantu hose basuzumwa, batanga ikori bizohera kuko vyatuma ibidandazwa bihononekarira kubera gutekurura bongera batekera.